Tovovavy roa naolan’ny jiolahy

26/04/2013

Nitrangana fanafihan-jiolahy tao amina tokatrano iray tao Ambohijafy Toamasina ny alatsinainy 22 avrily teo. Jiolahy efatra tsy nisaro-tava ary samy mitondra basy PA no nanao izany asa-ratsy izany. Renim-pianankaviana iray sy ny zanany vavy roa ka ny iray 26 taona ary ny faharoa 16 taona no tao an-trano tamin’io fotoana io.

Araka ny fantatra tamin’ny vaovao avy eny anivon’ny mpitandro ny filaminana nisahana ny raharaha, dia vao niditra ireto jiolahy ireto dia ny vola sy ny volamena tao an-tranon’ity fianakaviana ity no notakiany. Vokatry ny tahotra dia nanome izany ilay ramatoa mba hialan’ireto jiolahy ireto haingana tao an-tranony. Nandeha tokoa ireto jiolahy nefa nentin’izy ireo niaraka taminy koa ireo tovovavy roa tao an-trano. Nony tonga teo amin’ny kianja “Lemalady” ao Ambohijafy, dia naholan’izy ireo izy mirahavavy ka telo lahy nanolana ilay tovovavy 16 taona mbola virijiny ny iray kosa tamin’ilay zokiny 26 taona.
Nandritra izay, niantso vonjy tamin’ny manodidina ilay ramatoa ary niantso mpitandro ny filaminana. Nefa tara satria efa lasa ireo jiolahy. Mbola tamana ny fanolanana natao anefa ireto jiolahy ireto, dia niverina indray ny alin’ny talata 23 aprily. Efa mailo anefa ilay ramatoa ka mora ny fiantsoana polisy. Tonga ireto farany ka avy hatrany dia raikitra ny fifanenjehana. Maty voatifitra nandritra izany ny iray tamin’ireo jiolahy, ny faharoa kosa voatifitra fa mbola afaka nitsoaka. Ireo roa hafa tsy naninona saingy tafatsoaka ihany koa.
Ankoatra izay, dia zanaka mpandraharaha iray ao Toamasina koa izao no tafiditra amin’ny fikambanan’andiana jiolahy ao Toamasina. Rosin Edward no anaran’ity jiolahy ity izay naman’ny “Dog”. Tsy vitany manao fanafihana mitam-piadiana ity Rosin Edward ity, fa mbola manafika ny ray aman-dreniny ihany koa. Tratra ny tenany izao ka efa miandry fitsarana azy ao Ambalatavoahangy raha tafatsoaka nandritra ny fisamborana an’i “Dog” ny zoma teo tao Ankirihiry avaratra.