Nisy namaky ny trano fonenana manamboninahitra

26/04/2013

Nametraka fitarainana any amin’ireo ambaratongam-pahefana eo anivon’ny tafika sy tatitra eny anivon’ny fitsarana ny manamboninahitra iray ao anivon’ny toby 1 RM3 Toamasina. Indroa no nisy namaky ny trano fonenan’izany manamboninahitra izay. Trano fonenana izay tsy aiza fa ao anatin’ny toby no misy azy. Ho an’ilay manamboninahitra lasibatr’izao halatra izao dia tsy misy afa-tsy miaramila no nanao izany satria tsy ho vitan’ny mpamaky trano avy any ivelan’ny toby ny hanafika tranona manamboninahitra ao anaty toby.

Mitatra ary miha ratsy hatrany ny toe-draharaha vokatry ny disadisa eo amin’ny samy manamboninahitra miaramila ao amin’ny toby 1 RM3 Toamasina. Disadisa izay niainga tamin’ilay raharaha fakana an-keriny izay nahavoaroiroy manamboninahitra tao amin’izany toby izany taorian’ny nahafantarana fa basy sy bala avy ao amin’ity toby ity no nampiasain’ny jiolahy tamin’izany fanaovana an-keriny izany. Raha tsiahivina dia niteraka disadisa teo amin’ny samy manamboninahitra tao amin’ny 1 RM3 izany ny filazan’ny ampahany tamin’izy ireo fa nisy namoaka ny tsiambara-telon’izy ireo. Mazava loatra fa ny manamboninahitra naman’izy ireo ihany no nosoketany tamin’izany. Ary dia niafara tamin’ny fandroahana tamin’ny trano fonenany an’ilay manamoninahitra nendrikendrehina ho namoaka ny tsiambaratelo ny raharaha. Tsy nanaiky izany kosa anefa ity farany ka nampakatra ny raharaha teny amin’ny fitsarana, ary nahazo fandresena mazava teo anatrehan’ny mpitsara. Marihina fa na dia nahazo rariny teo amin’ny fitsarana aza ilay manamboninahitra dia tsy niverina tao amin’ny trano fonenany tao amin’ny toby ny tenany noho ny fahitany fa mety tsy ho voaaro ny filaminan’ny vady aman-janany manoloana ny disadisa efa vaky teo aminy sy ireo mpifanandrina aminy izay samy ao anatin’ny toby avokoa. Na izany anefa dia mbola tsy namindra ny entany tany ivelan’ny toby ny tenany.
Tsy azo antoka
Taty aoriana, araka ny vaovao mari-pototra avy amin’ity manamboninahitra ity dia nisy namaky io trano fonenany izay tao anaty toby miaramila io. Maro ny entana izay lasan’ny mpangalatra tamin’izany vaky trano indroa miantoana io. Velon-taraina noho izany ny tenany ary nanambara fa tsy olona avy any ivelan’ny toby no nanao izao asa-ratsy izao fa tsy maintsy avy ao anaty toby ihany. “Sarotra ho an’ny sivily, hoy izy, ny handroba tranona manamboninahitra ao anaty toby miaramila”. Nambarany ihany koa fa sady fahafaham-baraka ho an’ny tafika manontolo izao tranga izao, no haretina mikiky azy ihany koa satria izao no midika fa tsy azo antoka intsony ny filaminana na dia eo amin’ny samy miaramila aza.
Tsara ny mampatsiahy fa efa nisy ny fanampahan-kevitra noraisin’ny filankevitry ny minisitra mahakasika ny disadisa nisy teo amin’ny samy manamboninahitra tao amin’ny 1 RM3 Toamasina. Fantatra tamin’izany fa nesorina tsy ho mpibaiko izany toby izany ny tompon’nandrikitra teo aloha. Amin’ny 3 mai izao no hatao ny famindram-pahefana eo amin’ny mpitantana teo aloha sy ilay vao notendrena, raha araka ny loharanom-baovao any an-toerana. Fanovana izay heverin’ny maro fa hitondra amin’ny fanesorana ihany koa an’ireo manamboninahitra izay voakasik’ity disadisa any an-toerana ity.