Mpividy vato voatafika

26/04/2013

Vola mitentina 5 tapitrisa ariary no lasan’ireo jiolahy. Izay no vokatry ny fanafihana nianjady tamina mpividy vato iray tao Andranomadio 11/43 Toamasina ny alin’ny alakamisy 19 aprily tokony tamin’ny 07ora sy 15 min Araka ny fantatra dia efa-dahy nitondra basy PA no nanao izany fanafihana izany, ka ny iray ihany no nanao saro-tava.

Ny angom-baovao ihany koa no nahafantarana fa ilay mpiara-manofa trano amin’ilay mpandraharaha ihany no ati-doha nikotroka ny fanafihana. Izany hoe izy no nikaroka namana nanao ity fanafihana ity. Nilaza ny marina ny tenany nandritra ny fakana am-bavany azy teo anivon’ny mpitandro ny filaminana. Nambarany fa fantany tsara ary hitan’ny masony ny nampidiran’ilay mpandraharaha ny vola tao amin’ity tokantrano ity sy ny toerana nametrahan’izy mivady izany nandritra ny alina nahazoana ny vola. Tamin’izay, araka ny fanazavany no nitsirian’ny hevi-dratsiny ka nakany namana izay tsy iza fa zokiny ny iray ary mpianatra eo anivon’ny oniversiten’i Toamasina ny roa, hangalatra ilay vola. Nifampizarana mitovy ny vola taorian’ny fanafihana. Nanamarina izany ihany koa ny vadiny.

Raha nanaiky ny heloka nataony teo anivon’ny mpitandro ny filaminana izy telohaly ireto, dia nandà mafy izany kosa rehefa tonga teny anatrehan’ny fampanovana sy ny mpitsara mpanao famotorana. Tsy nahasakana an’ireto farany tsy handefa ireo voaroiroy hofonjaina vonjimaika any Ambalatavoahangy kosa anefa ny fandàvan’ireo voaroiroy ny fiampangana azy ireo. Ilay vehivavy tokana tafiditra tao anatin’ity raharaha ity kosa dia nahazo fahafahana vonjy maika.
Ankoatra izay, dia tranga “tsy fahita” no hitan’ireo mpanandraharaha teo anivon’ny fitsarana ny talata 23 aprily teo. Fotoana niakaran’ny raharaha teo anivon’ny fampanovana sy mpitsara mpanao famotorana. Satria dia tsy tahotra tsy henatra ireto fianakavian’ireto voaroiroy nampiasa “mpimasy” nanao “ody gasy” teo an-tsisin’ny arabe mba ho fanahafana ny havany voaroiroy eo anivon’ny fitsarana.