Hiverina hifampiresaka

28/04/2013

Mbola tsy fanampahan-kevitra farany akory ireo fanampahan-kevitra samihafa noraisin’ireo ambaratongam-pitantanan’ny antoko Leader Fanilo manoloana ny fifidianana, raha ny fanazavana avy amin’ny filoha lefitra nasionalin’izany antoko izany no jerena. Nambarany fa hivory indray ireo mpikambana rehetra amin’ity antoko ity amin’ny herinandro ho avy io ka ny fampitoviana ny tadin-dokanga eo amin’ny rehetra amin’ny fiatrehana ny fifidianana no tanjona amin’izany. Raha nilaza ny hanohana ny kandidà Hajo Andrianainarivelo ireo mpikambana amin’ny Biraom-paritra 16 ao amin’ny antoko Leader Fanilo dia nilaza ny mbola tsy fisian’ny marimaritra iraisana mikasika izany kosa ny filoha nasionaly lefitr’ity antoko ity, Toto Alphonse, raha namely ny fanontanian’ny mpanao gazety ny tenany omaly.

Nambarany fa mbola tsy fanampahan-kevitra raikitra akory izany. Namafisiny ihany koa fa hatreto dia tsy mbola manohana n’iza n’iza amin’ireo kandidà mpilatsaka ho fidina filoham-pirenena amin’izao fotoana izao ny antoko Leader Fanilo. Etsy an-kilan’izany dia nilaza ihany ity mpanao politika mpitarika lefitra ny antokon’Itompokolahy Herizo Razafimahaleo ity fa hiverina hifampiresaka indray ny rehetra ao amin’izany antoko izany amin’ny herinandro ho avy io. Tanjon’izany fihaonambe izay miendrika kongresy izany ny hamondronana indray ny hevitry ny isan’isany avy ary handrindrana ny hery hiatrehana ny fifidianana eto amin’ny firenena. Nambarany ihany koa fa tsy mivaky akory ny antoko Leader Fanilo na dia eo aza ny hevitra tsy mitovy izay nasehon’ny mpikambana tato ho ato.
Vokatry ny krizy
Nokilasin’ny filoha lefitry ny Leader Fanilo ho isan’ny vokatry ny krizy ireny tranga nisy tao amin’ity antoko ity ireny. Efa nanantena ny hilatsaka ho fidina filoham-pirenena ny tenako, hoy ihany ny fanazavan’ity mpanao politika ity, kanefa noho ireny fandavana sy savorovoro nitranga teo anivon’ny antoko ireny dia voatery nihemotra. Azo heverina arak’izany rehetra izany fa na dia eo aza ny mety hisian’ny dinika vaovao eo amin’ny samy mpikambana ao amin’ny antoko Leader fanilo dia tsy hisy hatrany ny kandidan’ity antoko ity amin’ny fifidianana filoham-pirenena. Ny fanohanana ny iray amin’ireo izay efa nandrotsaka ny filatsahan-ko fidiny kosa no azo heverina fa ho vokatr’izany fiaraha-midinika manaraka izany.