Nihaona tamin’ireo mpanao fihetsiketsehana

03/11/2012

Mbola tsy fantatra hatreto na hanajanona ny fihetsiketsehana ataon’ireo mpiasa tarihan’ny vondrona “tsisy miala aketo niany” ny fisian’ny fihaonana teo amin’ireto farany sy ny délegasiona avy amin’ny Tetikasa Ambatovy notarihan’ny tale jeneraly lefitra, Kevin Muller, ary ny avy ao amin’ny fiadidiana ny Faritra Antsinanana notarihan’ny filohany Alain Mahavimbina. Nandritra izany fihaonana izany no nitondran’ny tale jeneraly lefitry ny teteikasa Ambatovy fanazavana mikasika ny fitakian’ireo mpiasa lany fifanarahana tao amin’ny orin’asa. Nampanantena ny hanara-maso ny fomba fampidirana mpiasa ao amin’ireo orin’asa manana fifanarahana amin’Ambatovy ihany koa ity tompon’andraikitra ity.

. Tsy azo antenaina kosa ny hanomezan’ity tetik’asa ity ilay vola 6 tapitrisa ariary isaky ny mpiasa tapitra fifanarahana tamin’ny orin’asa, raha araka ny fanazavana nandritra ity fihaonana ity.

Tsy teny an-dalam-bè tahaka ny niseho tamin’ny herinandro lasa teo no nifanome hafatra ireo mpanao fihetsiketsehana avy ao amin’ilay fikambanana vaovao fantatra amin’ny hoe “tsisy miala aketo niany” any Toamasina sy ny tompon’andraikitra avy ao amin’ny tetik’asa Ambatovy ary ny fiadidiana ny Faritra Antsinanana. Araka ny nitranga tamin’ny alakamisy 1 novambra lasa teo dia afaka nihaona an-databatra boribory izy ireo. Fihaonana izay natao tao amin’ny efitrano malalaky ny Faritra Antsinanana ary naharitra adim-pamataranandro roa.
Nambaran’ny tale jeneraly lefitry ny tetikasa Ambatovy, Kevin Muller fa “tsy marina ny ankamaroan’ny filazana fa nanome toky ny hanolotra vola 6 tapitrisa ariary isaky ny mpiasa naato tamin’ny asany nandritra ny fanarenana ny orin’asa ity tetikasa ity”. Nomarihan’ity filoha tale jeneraly lefitra ity ihany koa fa tsy marina ny filazana fa efa nanome izany vola izany ho an’ny mpiasa lany fifanarahana tany Moramanga ny tetikasa. Be loatra, hoy izy, ny lainga afafy mikasika ny tetikasa Ambatovy. Noho izany dia tsy hampiditra ny raharaha amin’ny fitsarana izy ireo. Nomarihany ihany koa fa misy ny fampiasana hosoka amin’izao raharaha izao, ka manakorontana ny saim-bahoaka sy manalabaraka ny tetikasa.
Isan’ny nanana ny nambarany nandritra ity fihaonana ity ihany koa ny lehiben’ny faritra Mahavimbina Alain. Nanambarany fa “tsy tsara ny famitapitahana amin’ny resaka ara-bola tahaka izao: lainga, fitaka, vandy avokoa ny nambara hatreto ka manakorontana ny filaminam-bahoaka; koa renareo izay ny marina rehetra, ka anjaranareo no mandinika ny sisa”.
Ankoatr’izany rehetra izany dia isan’ny nitondran’ny tale jeneraly lefitry ny tetikasa Ambatovy fanazavana ihany koa ny mahakasika ilay vola 25 tapitrisa dolara, entina hanaovana asa sosialy eto amin’ny faritra atsinanana sy ny faritra Alaotra-Mangoro . “Izahay Ambatovy ihany no mitantanana io vola io sy mandinika ny fetezan’ny tetik’asa hampiasana azy. Mbola izahay ihany koa no mitady ny orin’asa hanao ny asa rehetra. Miainga amin’ny fanjakana kosa ny tetikasa atao”, hoy ny fanazavany. Raha mikasika ny fanampiana “AIDE – BRMO” kosa, dia “hetsika noraisin’ny tetikasa ireny mba ho fanampiana ireo mpiasa nahavita be tamin’ny orin’asa sy hitsinjovana azy ireo mandram-pahitany asa indray”, hoy ihany ny fanazavany.
Farany, nambaran’ity tompon’andrikitra ambnony ao amin’ny tetikasa Ambatovy ity fa mba hisian’ny mangaraharaha tanteraka, dia hisy ny fanaraha-maso ny fampidirana mpiasa ataon’ireo orin’asa miara-miasa amin’ny tetikasa:“Hangatahanay amin’ireo orin’asa ireo ny lisitrin’ny mpiasa ao aminy, satria efa nifarahana tamin’izy ireo ny fandraisana mpiasa zanaky ny faritra”, hoy hatrany I Kevin Muller namarana ny fanazavany tamin’ireto mpikatrika ny hetsika “tsy misy miala aketo niany”.
Hatreto dia tsy fantatra na resy lahatra na tsia tamin’ny fanazavana nataon’ny tetikasa Ambatovy ireto mpanao fihetsiketsehana tarihan’ny fikambanana “tsisy miala aketo niany” na tsia. Amin’ny fihandohan’ny herinandro va ho fantatra izany amin’ny alalan’ny fanajanonana na tsia ny hetsika izay efa nataon’izy ireo.