Miisa 2800 ny nanao fanambaram-panana

28/04/2013

Araka ny tatitra nataon’ny tao anivon’ny Zandarmariam-pirenana dia mahatratra 2800 ireo fanambaram-pananana nataon’ireo zandary, « officiers de police judiciaire » izay naterina teny amin’ny biraon’ny BIANCO manerana ny nosy, tao anatin’ny telo volana voalohany tamin’ity taona ity.

Efa nanatitra ny azy tsirairay avy ireo faripiadidiana sy ny sekolin’ny zandarimaria manerana ny Nosy. Miisa 60 kosa ireo fitarainana voaray mikasika ny kolikoly ataona zandary manerana an’i Madagasikara izay nanasaziana zandary miisa 77 ary ahitana manamboninahitra sy manamboninahitra lefitra izany. Misongadina amin’io ny kolikoly ny fanadinana hahafahana manao fiofanana na stage azoana grady sy ny kolikoly amin’ny fanatanterahana ny asa.
An-koatr’izay, fantatra ihany koa fa hisy ny fanaraha-maso hentitra niarahana tamin’ny ministeran’ny Asam-panjakana sy ny Birao mahaleo tena iadiana amin’ny kolikoly tamin’ireo fifaninanana hidirana ho mpianatra zandary andiany faha-70 hatao ny 25 sy 26 mey 2013 izao. Hisy ihany koa ny fametrahana ireo sivana hampangarahara ny fifaninana anatiny rehetra.

Miroso amin’ny fanamafisana ny fahaizamanaon’ny zandary ihany koa ny zandarmariam-pirenena amin’izao fotoana izao.Misy ny fanofanana na “recyclage” atao hoan’ireo zandary mpiana-draharaha nivoaka tao amin’ny andiany faha 67,68, 69 ary ireo zandary efa amperinasa eo amin’ny lafiny ara-miaramila, fitandrona ny filaminana, haizatra amin’ny basy, fiarovana ny toby. Eo ihany koa ny fanofanana ireo mpianatra ho zandary andiany faha 69 tsy nahazo ny naoty miaramila 12/20 nandritra ny fiofanana ary fitaizana ara-batana amin’ny fanatajahan-tena isaky ny alatsinainy sy zoma.

Marihina fa zandary 166 (manamboninahitra sy manamboninahitra lefitra) no nosaziana ara-pitsipika noho ny tsy fanarahana izany. Mitontaly 107 kosa ireo zandary nafindra toerana hanampy ireo miasa any amin’ny tobim-paritra (brigades territoriales), isan’izany ireo zandary mpiana-draharaha na gendarme stagiaire.