Mirongatra ny halatra entana

28/04/2013

Tranga telo no niseho tao anatin’ny roa herinandro monja. Nanjavona avokoa ny entan’ny mpandeha tao ambony tafon’ny fiara mpitatitr’olona. Teo anelanelan’i Moramanga Ambatondrazaka no nisehoan’izany. Araka ny fiheveran’ireo mpandeha sy mpitatitra dia amin’ireo ampahan-dalana ratsy izay mahavoatery handeha miadana ny fiarakodia no hanararaotan’ireo jiolahy mangalatra ny entan’ny mpandeha. Marihina fan a dia teo azan y fampanantenan’ny filohan’ny tetezamita ny amin’ny fanamboarana ny lalam-pirenena faha 44 dia mbola tsy tomombana araka ny niheverana azy izany làlana izany amin’izao fotoana izao.

Fiara mpitondra mpandeha miisa 3 izay samy an’ny koperativa Trans couple, miasa amin’iny lalam-pirenena faha 44 iny no lasibatry ny fandrobana entana tao anatin’ny herinandro. Araka ny loharanom-baovao dia efa any Moramanga na efa any Ambatondrazaka vao hita fa nisy nandrovitra ny labasy ary nisy naka ny entan’ny mpandeha. Mandeha alina rahateo ireo fiara ireo, vokatr’izany, tsy henon’ny mpandeha ny fisian’ny halatra mitranga any ambonin’ny tafon’ny fiara any.
Fampanantenana poak’aty
Iray amin’ireo fampanantenana nataon’ny filohan’ny tetezamita ny hanarenana an’iny lalam-pirenena faha 44 iny. Raha ny zava-misy amin’izao fotoana izao anefa dia fampanantenana toy ny fanaon’ny mpanao politika ihany izany satria mbola ratsy avokoa ny ampahany betsaka amin’izany lalam-pirenena izany, raha tsy hiteny afa-tsy ny ampahan-dàlana eo anelanelan’I Andaingo sy Amboasary ary ny eo anelanelan’4Ambatondrazaka sy Andaingo isika. Ireo ampahany vitsivitsy tamin’izany lalana izany ihany no nasiam-panarenana tamin’ny alalan’ny fandrakofana vatokely sy fandrakofana tara manify dia manify amin’ny faritra kely dia kely. Raha misy dia misy dia manodidina ny 10km no vita fanarenana amin’izany ampahan-dàlana izany. Etsy an-danin’izany anefa, rah any zava-misy amin’izao isika miteny izao dia efa manomboka ho simba tanteraka ihany koa ireo ampahan-dàlana nasiam-panarenana ireo vokatry ny oram-pahavaratra farany teo sy vokatry ny fandalovan’ireo fiara vaventy, indrindra ireo mpitondra hazo amin’izany faritra izany.