Hamoaka ny marina rehetra ato ho ato

29/04/2013

Andro vitsivitsy mialoha ny hamohan’ny CES ny anaran’ireo kandidà mahazo mifaninana amin’ny fifidianana filoham-pirenena, naneho ny fahavononany hamoaka ho fanta-bahoaka ny vokatry ny fanadihadihana nataony ireo kaomisiona manokana natsangana teo anivon’ny parlemanta. Nambaran’izy ireo, omaly, fa tsy ho ela dia hiroso amin’izay fampahafantarana ny vokam-panadihadiana izay izy ireo. Isan’ny lehibe indrindra amin’izany ny raharaha andramena izay nambaran’izy ireo fa mahatratra 4 miliara dolara ny totalim-bidin’ireo izay efa naondrana hatramin’izao. Misy amin’ireo kandidà mpilatsaka ho fidina ho filoham-pirenena no voaroiroy amin’ireo halatra sy fandrobana ny harem-pirenena. Nisongadina izany, omaly, nandritra ny valan-dresaka ho an’ny mpanao gazety izay nokarakarain’ireo parlemantera mpikambana ao amin’ilay kaomisiona manokana nanao fanadihadiana mikasika ireo raharaha samihafa nitranga teto amin’ny firenena.

Nambaran’ireto parlemantrera ireto ihany koa fa ny vola azo avy amin’ny fanodikodinana ny harem-pirenena na fanodikodinana fananam-bahoaka no entin’ny kandidà sasany haka fahefana amin’ny alalan’ny filatsahan’izy ireo ho kandidà filoham-pirenena. Efa vonona avokoa amin’izao fotoana izao, araka ny fanazavan’ireto parlemantera ireto, ireo atontan-taratasy rehetra vokatry ny fanadihadiana nataon’izy ireo mahakasika ireo raharaha samihafa nitranga teto amin’ny firenena. Isan’izany ny raharaha fandripahana sy fanondranana an-tsokosoko ny harem-pirenena toy ny volamena sy ny andramena ary ny vatosoa. Nambaran’ireo parlemantena fa mahatratra 4 miliara dolara ny vidin’ireo bois de rose rehetra naondrana tany ivelany hatramin’izao. Ireo vola ireo anefa no entin’ny kandidà sasantsasany miatrika ny fifidianana filoham-pirenena amin’izao fotoana izao. Maro dia maro ihany koa ireo seranan-tsambo sy seranam-piara-manidina izay namoahana ireo harem-pirenena ireo no voaroiroy amin’izany rehetra izany.
Fandrobana tanin’olona
Ankoatry ny raharaha fandrobana ny harem-pirenena dia isan’ny atontan-taratasy efa vonona ary havoakan’ireo parlemantera ihany koa ny mikasika ny fandrobana ireo tanin’olona izay nahazo vahana tanteraka nandritra ity tetezamita ity. Mahatratra 3 tapitrisa ireo olona noroahina tsy ara-drariny tamin’ny taniny na very tanindrazana vokatry ny antsonjay nataon’ireo mpanararaom-pahefana, araka ny tatitr’ireo kaomisiona parlemantera ireo. Nisy tamin’ireo very tanindrazana ireo no nesorina tamin’ny taniny tamin’ny andro alina. Nisy ireo noroahina tamin’ny alalan’ny fitaovam-piadiana sy ny fampihorohorona.
Nanome toky ireo parlemantera fa tsy ho ela dia havoaka ho fantatry ny be sy ny maro ny atontan-taratasy rehetra efa eo am-pela-tanan’izy ireo mikasika izany rehetra izany. Tsiahivina fa efa am-bolana maro no efa niasa ity kaomisiona manokana teo anivon’ny parlemanta ity. Nisy ny fidinan’izy ireo teny anivon’ny faritra isanisany avy tamin’ny fanatontosana ny fanadihadiana manandrify ny andraikitra nakinina tamin’izy ireo. Isan’izany ny raharaha andramena, ny raharaha mikasika ny nahafatesan’i Nadine ramaroson, ny raharaha asan-dahalo tany atsimo, ny raharaha seranan-tsambon’i Toamasina.