Nosamborin’ny zandary ilay parlemantera

29/04/2013

Mitaky ny famoahana tsy misy fepetra ny mpikambana ao amin’ny kongresin’ny tetezamita izay nosamborin’ny zandary tany Mananjary tamin’ny 20 avrily lasa teo ny parlemantera namany. Araka ny loharanom-baovao avy any an-toerana dia tamin’io daty io tokony ho tamin’ny 10 ora sy sasany alina no nosamborin’ny zandary ity parlemantera ity izay nanao fitsidihana tany amin’ny toeram-pitrandrahana vato saro-bidy tao amin’ny fokontany Fiadanana any Mananjary.

Afaka nandositra ary tsy voasambotra tamin’io fotoana io kosa ireo olona izay niara-dàlana tamin’ilay parlemantera. Araka ny fantatra dia efa nakaton’ny fitondram-panjakana io toeram-pitrandrahana vatosoa. Mbola misy hatrany anefa ireo izay manohy ny fitrandrahana izany any an-toerana ary mifehy tanteraka ny fahafaha-miditra ao amin ‘io faritra io. Voalazan’ny loharanom-baovao ihany koa fa miara-miasa amin’ny mpitandro filaminana avy ao amin’ny zandarmariam-pirenena izy ireo amin’izay. Fantatra ihany koa, ankoatr’izay, fa misy ny fanamparam-pahefana ataon’ireo mpifehy ity toeram-pitrandrahana safira ity ary dia izay indrindra no isan’ny antondian’ilay parlemantera tany an-toerana.
Taorian’ny fanadihadiana nataony tamin’ireo vahoaka iharan’ny tsindry hazo lena tamin’izany toeram-pitrandrahana vatosoa izany, araka ny fitantaran’ny vavolombelona tany an-toerana dia nosamborin’ny mpitandro filaminana avy ao amin’ny zandary ilay mpikambana ao amin’ny kongresin’ny tetezamita. Araka ny fanazavan-dRasolofoniaina Robert Félicien, filohan’ny HPM fa zandary avy any Fianarantsoa ireo nisambotra ity parlemantera ity, ary tsy mbola fantatra hatramin’izao ny toerana nametrahan’izy ireo azy.
Efa nanantona ny fiadidiana ny zandarmariam-pirenena ireo parlemantera izay mitaky ny famoahana ity naman’izy ireo nosamborina ity, raha araka ny fanazavan’ny filohan’ny HPM. Nambarany ihany koa fa nilaza ny handray andraikitra manandrify ity raharaha ity ny komandin’ny zandarmariam-pirenena.