Navoaka ny fonja avokoa ireo voaroirohy

02/05/2013

Sazy mihantona iray taona no sazy azon’ny filoha lefitry ny Fikambanana Fagnomba. Afaka madiodio kosa ireo mpiray fikambanana aminy izay voaroiroy tamin’ireo raharaha nampidirana am-ponja azy ireo. Tsy inona izany fa ny fitorian’ny orin’asa QMM an’ireo mpanao fihetsiketsehana noho ny fisian’ny sakan-dàlana izay nampikatso ny asan’izany orin’asa izay. Teo ihany koa ny fitoriana nataon’ny filohan’ny CENIT noho ny fanimbana ny fitaovan’ny biraon’ity kaomisiona ity tany Taolagnaro.

Tontosa omaly ny fitsarana ireo rehetra voaroiroy tamin’ilay fihetsiketsehana tany Taolagnaro ka nampidirana am-ponja vonjimaika ireo mambra sasantsasany tamin’ny fikambanana Fagnomba izay nitarika izany hetsika izany. Raha tsiahivina dia efa tamin’ny 2 avrily no tokony natao ny fitsarana azy ireo saingy nahemotra izany noho ny tsy nahatongavan’ny mpisolovava ny orin’asa QMM teny amin’ny fitsarana. Mikasika ny fitsarana izay natao omaly tao amin’ny fitsarana ambaratonga voalohany tany Tolagnaro dia raharaha telo samy mahavoaroiroy an’ireo mpikambana amin’ny fikambanana Fagnomba no notsaraina. Ny iray dia ny fitorian’ny orin’asa QMM hono ilay fanakanan-dàlana izay nampikatso ny asan’ity orin’asa ity tamin’izany fotoana izany. Sazy mihantona herintaona no nomen’ny fitsarana an’i Perle Zafinandro filoha lefitry ny Fagnomba miaraka amin’ny mpikambana iray tao amin’izany fikambanana izany noho ity sakan-dàlana ity. Ny raharaha faharoa kosa dia ny fitorian’ny CENI-T. Marihina fa tsy araka ny voalaza hatrany am-boalohany ny voaoatin’ady tamin’ity fitorian’ny CENI-T ity satria raha halatra sy fandrobana ny fitaovana tao amin’ny biraon’ny CENI-T tany an-toarena no nambara dia fanimbana fitaovana kosa no voalazan’ny fitsarana fa iampangana azy ireo. Taorian’ny fandinihan’ny fitsarana ny raharaha dia nafahana madiodio noho ny fisalasalana ireo voapanga. Marihina ihany koa fa ity raharaha fahavakisan’ny biraon’ny CENI-T tany Taolagnaro ity no antony nisamborana ary nampidirana am-ponja vonjimaika ny filoha lefitry ny Fagnomba sy ireo mpikambana hafa tao amin’ity fikambanana ity. Ny raharaha fahatelo izay nitsarana ireto mpikambana ao amin’ny Fagnomba ireto kosa dia ny fitoriana miaramila iray izay naratra nandritra ny hetsika nataon’ny Fagnomba. Araka ny fantatra dia nisintona ny fitoriana ilay miaramila.
Fitakiana tamin’ny orinasa QMM
Tsara ny mampatsiahy fa nifantoka tamin’ny fanoherana manoloana ny tsy fatanterahan’ny orinasa QMM ny fifanarahana tamin’ireo tompon-tany tany amin’ny faritra iasan’ity orinasa ity no fototry ny hetsiky ny fikambanana Fagnomba tany Toalagnaro. Naharitra herinandro maromaro izay hetsika izany izay tafapaka hatramin’ny fanatanterahana fanakanana ny lalana miditra any anivon’ny orinasa. Tafiditra tamin’ity raharaha ity ihany koa ny fiadidiana ny Faritra Anôsy izay tondroin’ireo mpikambana ao amin’ny Fagnomba ho tsy nandray ny andraikiny amin’ny fiarovana ny vahoaka manoloana ny tsy firaharahian’ny orin’asa QMM azy ireo. Teo ihany koa ny fampiasan-kery nataon’ny mpitandro filaminana tamin’ireo mpanao fihetsiketsehana izay nambaran’ny fikambanana Fagnomba fa baiko avy amin’ny lehiben’ny faritra tany an-toerana. Ankoatr’ireo dia nitatra tany amin’ny resaka fahavakisan’ny CED tany an-toerana ny raharaha ka mbola ry zareo mpikambana ao amin’ny Fagnomba ihany no voaroiroy tamin’izany raharaha izany.
Amin’izao fazoan’ireo mpikambana Fagnomba fahafahana izao sy ny fivoahan’izy ireo ny fonja dia mametram-panontaniana ny amin’izay mbola mety ho tohin’ny hetsik’izy ireo ny maro. Raha araka ny fantatra tokoa dia mbola tsy nisy vokany azo tsapain-tanana izany hetsika nataon’ireto mpikambana ao amin’ny Fagnomba ireto, indrindra noho izy ireo nampidirina am-ponja.