Handray andraikitra ny “comité des sages” Toamasina

02/05/2013

Hiditra an-tsehatra amin’ny fikaroham-bahaolana manoloana ny fijenonan’ny asa fanarenana ny lalam-pirenena faha 5 ny “comite des sages” any Toamasina. Fantatra izany araka ny fiantsoana fihaonambe izay nataon’izy ireo toy izay efa nataony manoloana ny olan’ny delestazy tao Toamasina. Hisy arak’izany ny fihaonana hitadiavam-bahaolana hataon’ny « comité des sages » ny zoma izao amin’ny 09ora ao amin’ny trano fivorian’ny faritra atsinanana. Antsoin’izy ireo amin’izany ny fikambanan’ny mpitatitra, ny mpandraharaha ara-pizahan-tany ary ny tompon’andraikitra eo anivon’ny MainLand sy ireo orinasa nahazo ny tolotra momba ny fanamboarana ny RN5. Miankina amin’ity fihaonana ity ny mety hisiana na tsy hisian’ny fitokonana goavana hataon’ireo mpitatitra amin’ny RN5, satria raha atao 50 minitra hatramin’ny ora iray ny lalana mampitohy an’i Toamasina I sy Foulpointe teo aloha, dia ora 02 ka hatramin’ny ora 03 izany amin’izao fotoana izao.

Tsy mitana ny teny nataony

Tsara ny mampatsiahy fa ny faran’ny volana mai izao raha ny nifanarahana no tokony hifarana ny asa fanarenana ny lalam-pirenena faha-05. Fifanarahana izay nisy teo amin’ny MainLand sy ny minisiteran’ny asa vaventy tamin’ny volana janoary lasa teo. Efa iray volana anefa izao no niato ny asan’ireo orinasa manao izany fanarenana izany, ary tao anatin’ny roa volana sy tapany nanaovan’izy ireo ny asa dia tsy mbola tonga tao Antetezambaro 12 km akory ny asa kanefa hatrany Mahavelona Foulpointe izay 53km no hamboarina. Araka ny loharanom-baovao dia olana ara-bola no mahatonga ny fiatoan’ny asa. Izany hoe tsy voaloha ny vola ho an’ireo orinasa roa nanao ny asa. Teo koa anefa ny fihetsiky ny orinasa MainLand izay fantatra fa nitsoaka tany Chine ny tale jeneraliny ny volana martsa teo.
Tsy azo adinoana ihany koa anefa ny vavabe nataon’ireo tompon’andraikitra ka isan’izany ny filohan’ny FAT kanefa tsy hita akory ny fandroahana nambarany ny 20 janoary teo. Isan’ny namoaka vavaihany koa ny lehiben’ny faritra Analanjorofo, Saina Michel izay nilaza ny hitaona vahoaka hitondra sora-baventy. Amin’izao fotoana izao anefa dia ilaozany “mitsangantsangana” any frantsa sy afrika isam-bolana. Ny lehiben’ny faritra atsinanana Mahavimbina Alain, na sahiran-tsaina aza, tsy hitany izay atao satria ny tale sy ny minisiteran’ny asa vaventy no tompo-marika aminy asa.