Niofana ho mpanapakevitra

03/05/2013

Tontosaina ny 02 sy 03 mai etsy amin’ny Hotel Restaurant Ibis Ankorondrano ny fampiofanana ireo vehivavy mpanao politika sy ireo izay mpikambana eny anivon’ireo antoko. Iarahana amin’ny vondron’ny vehivavy mpanao politika manerana ny ranomasimbe Indiana na ny (FPOI) sy ny avy ao amin’ny EISA izay mandrindra ny demokrasia eto Afrika moa ity fampihofanana ity. Mahatratra 35 ny isan’ireo vehivavy mpandray anjara, ahitana ny avy ao amin’ny antoko TGV, Ampela manao politika, ny antoko maitso…, ary saika nahitana solotena avokoa ireo antoko sy fikambanana. Natao moa ity hetsika ity mba hanomezana sehatra lehibe ireo vehivavy ary indrindra mba hamolavolana azy ireo ho mpanapa-kevitra sy ho toa teny eny anivon’ny antoko politika misy azy.

50% ny vehivavy no ho mpanapakevitra farany amin’ny 2015
« Ny 50% ny toerana mpanapakevitra izay amin’ny taona 2015 dia antenaina fa vehivavy avokoa ary mandritra ny fifidianana solombavam-bahoaka izay ho tontosaina ny volana jolay izao dia inoana hitombo ny isan’izy ireo, aorian’ny fampihofanana. Izay no anisan’ny Tanjona”, hoy ramatoa Tania Rajaonarisoa izay mpikarakara ny fampihofanana avy ao amin’ny EISA. Ary ny tena andrasana dia ny hitombon‘ izy ireo isa amin’ny fandraisana anjara eny anivon’ny sehatra maro misy azy ireo. “Tsy natao haingon-trano na fanaka malemy fotsiny ny vehivavy fa mba homena sehatra ahafahany maneho ny heviny izay no anisan’ny antom-pisian’ny fampiofanana”, hoy hatrany ramatoa Tania. Misy karazany maro ireo paikady entina mampitombo ny fandraisana andraikitr’izy ireo ary koa ny isan’izy ireo eny anivon’ny antoko mba hoe hitovy ny salan’isany lehilahy sy ny vehivavy. Rehefa tratra sy voaray ny paikady dia entina izany eny anivon’ny antoko misy azy ireo tsirairay avy ary hisy ny fampiarana izany. “Antenaina hitombo ny isan’ireo vehivavy”, hoy ramatoa Tania Rajaonarisoa izay mpikarakara ny fampihofanana.
Fampandraisana anjara ny vahoaka
Ny antoko politika no anisan’ireo varavarana mitondra ny vahoaka hiroso amin’ny fandraisana fanapahan-kevitra eo anivon’ny fiarahamonina. Manaraka izany koa ny fanentana ny fiainana ara-politika, ny fanabeazana ary ny fandrindrana hevitra. Ireo antoko ireo ihany koa no misafidy ireo tomponandraikitra afaka sy manana fahefana hitantana. Izany hoe ireo fikambanana ireo no manapaka izay hatolotra ny fitondrana. Mba manaraka sy manaja izany ve ny rafitra misy eto amintsika raha toa ka ireo antoko izay maniry eran’ny vazatany no asiana topi-maso ? Mbola io vondrona io ihany koa no manolotra ireo olona izay mendrika ho fidiana. Tsapa ihany koa fa eny anivon’ny antoko politika ny vehivavy no afaka maneho hevitra bebe kokoa ary ao anatin’izany ihany koa no làlana hamelabelarana ny traikefan’izy ireo raha tiana handroso sy hirindra ny tontolo iainana izay manasongadina ny fitovian-jo eo amin’ny lahy sy ny vavy. Izany fitovina izany no mitarika ny firenena hiroso haingana amin’ny fandraisana fanapahan-kevitry ny firenena iray. Araka izany dia tokony homena sehatra sy andraikitra maro ireo vehivavy eny anivon’ireny antoko na fikambanana ireny.