Natsangana ny komity fanangànana ny holafitra

04/05/2013

Tontosa omaly 03 mai 2013 ny fankalazana ny andro iraisam-pirenena ho amin’ny fahalalan’ny mpanao gazety. Tsy latsa-danja tamin’izany ihany koa ny an’ireo fikambanan’ny mpanao gazety zokiolona na ny CJD, izay notanterahina tetsy amin ‘ny hotel restaurant « Au bon coin » Ambatonakanga, tamin’ny 10 ora maraina. Tapaka tamin’izany ny fananganana ny komity ho fananganana ny holafitry ny mpanao gazety. Ahitana ireo solotenan’ny fikambanana tsirairay io komity io. Ohatra amin’izany ny ao amin’ny sendikan’ ny mpanao gazety, Rasoanaivo Rocco, ny avy amin’ny UJMH, Matavimanana Ravao Georgine… Natsangana moa ity komity ity noho ny fahitana sy fahatsapana fa tena mbola atao ankilabao ny mpanao gazety eto antoerana .Tapaka tamin’io andro io ihany koa fa ny atalata faha 7 ny volana mai 2013 izao izy ireo no hivory indray ao amin’ny « Au bon coin » ihany ary anentanana ireo mpanao gazety mangetaheta fahafahana.

Roso ny dia
“Na misy aza ny mety ho fanakanana na fandavana izay ataon’ireo tompon’andraikitra, dia tsy hiemotra velively ny komity satria efa roso ny dia. Efa tapaka fa tsy maintsy hatao ity ady miaro ny zon’ny mpanao gazety ity”, hoy Taitsy Gilbert, sekretera jeneralin’ ny mpanao gazety zokiolona. “Anisany fanontaniana mibahana ny sain’ny maro eto amin’ny nosy tokoa ny fahalalan’ny mpanao gazety ary iadina mafy tokoa. Tsy vitan’izany anefa fa mila ny firaisankinan’ny mpanao gazety sy ny fahavononan’ny tsirairay amin’izany raha tiana hiroborobo ity sehatra ity”, hoy ny fanamafisan’ny sekretera jeneraly.
Tetezamita : fanagejana
“Raha tsiahivina ny tantara dia ity fitondrana tetezamita ity no anisan’ny nanidy haino aman-jery betsaka indrindra. Raha tamin’ny repoblika faharoa ohatra dia maro ny sivana fa tsy nisy ny nakatona, raha raisina ohatra ny RFV na radio feon’ny vahoaka. Teo ihany koa ny Radio Tsiokavao izay samy naniratsira sy nanivaiva ny fitondrana nefa samy tsy nisy nakatona”, hoy Moks Razafindramiandra, filohan’ny CJD. “Tsy latsa-danja amin’izany ny toe-draharaha izay misy an-kehitriny , toa saika fanagejana sy fanaporetana no iainan’ireo mpanao gazety. Eo ihany koa ny ataon’ireo tompon’ny orinasa. Ny haino aman-jery no ahafahana mandrefy ny fahaiza-manao sy ny lesoky ny firenena ary manarina ny tsy mety. Nefa anisan’ny asa voageja sy kely karama izay tsy mifanaraka amin’ny zon’ny mpiasa .Noho izany dia toa zary lasa mpanohana ireo mpanao politika ny mpanao gazety ary izany no maha goragora ny asa. Tsy mijanona amin’izany ihany fa toa zary lasa mpifandrafy izy ireo noho ny tombotsoa azo avy amin’ireo mpanao politika”, hoy Taitsy Gilbert nanamafy.
Ady amin’ny tsipelina diso
“Anisany sakana ho aminy famakiana ny gazety ny fahamaroan’ny tsipelina diso ao anatiny. Tsara ho fantarina anefa fa ny asa fanoratana gazety dia fampitana vaovao sy fahalalana. Araka izany dia tsy tokony hatao teny sarotra fanoratra na dikany ny asa soratra mba ho mora amin’ny maro ny mitadidy sy mandray ny hafatra tiana hampitaina. Araka izany dia ny fampiharana ny fitsipi-panoratana ady aminy tsipelina diso ka ny mpanao gazety no ohatra voalohany “, hoy Rahaingoson Henri, mpanoratra sy mpandika teny malagasy. Ilaina araka izany ny fampiofanana ireo mpanao gazety mba ho matihanina amin’ny asa atao.