« Ilay notam no nahatafita an’i Lalao Ravalomanana »

06/05/2013

Nandritra ny hetsika goavana teny amin’ny kianjan’ny Magro Behoririka ny asabotsy teo no nilazan’ny mpisolovava ny ankolafy Ravalomanana fa ilay “notam” namelezan’ny fitondrana Tetezamita an-dRavalomanana mivady ihany no fitaovana nampiasain’izy ireo tamin’ny fandresen-dahatra ny CES mikasika ny atontan-taratasy filatsahan’i Lalao Ravalomanana. “ Raha nody teto Dada sy Neny tamin’ny herintaona dia tsy navela fa nasiana “notam”. Iny no nampiasaina tany amin’ny CES. Nisy ihany koa ny volana jolay tamin’ny herintaona izay efa voatomboky ny polisy teny Ivato ny passeport-ny”, hoy ny fanazavana nataon’i Maître Hanitra Razafimanantsoa nandritra ny fanazavany teny amin’ny Magro. Tsy tongatonga ho azy ireny hoy ihany izy, fa ireny no nampiasaina tany amin’ny CES ary rehefa namoaka didy izy ireo dia tao ny an’i Neny.

Minoa fotsiny ihany
Nandray anjara voalohany tamin’ny hetsiky ny ankolafy Ravalomanana teny amin’ny Magro ihany koa, ary araka ny feo efa nandeha hatramin’ny herinandro teo, ny kandidà Lalao Ravalomanana. Fiarahabana marososona no azony teny an-toerana. Isan’izany ny fahatratrarany ny tsingerin-taona nahaterahany. Teo ihany koa ny nahatafaverenany soamatsara teto an-tanindrazana. Ary ny goavana indrindra dia ny nahatafidirany ho isan’ny kandidà mahazo mifaninana amin’ny fifidianana filoham-pirenena. Mazava loatra fa naneho ny fankasitrahany ny vahoakan’ny ankolafy Ravalomanana ny tenany ary niantso azy ireo mba hanao arak’izany azo atao ho fampandresena ny tolona. “Vonona izahay, vonona isika mbola hitondra anjara biriky ho an’ity firenena ity, hanondrotra avo an’i Madagasiraka. Alao hery ary fa tsy adidiko izaho samy irery fa adidintsika rehetra. Satria finoana hoy izy no resahintsika, ary na ity toerana ity aza dia nomenareo hoe kianjan’ny finoana dia horaisiko indray ho teny filamatra izay noraisana tamin-pinoana hoe : « aza matahotra, minoa fotsiny ihany ». Ireo no ampahany tamin’ireo teny nentin’ny kandida Lalao Ravalomanana nankahery ireo mpiara-dia taminy ny asabotsy teo.