Notsipahan’ny Leader Fanilo

06/05/2013

Tontosa tamin’ny faran’ny herinandro teo ny fihaonan’ireo mpikambana ao amin’ny birao mpandrindra nasionalin’ny antoko Leader Fanilo. Nandritra izany fivoriana izany no nandraisan’izy ireo fanampahan-kevitra mikasika ny kandidà izay ho tohanany amin’ny fifidianana filoham-pirenena. Fantatra arak’izany fa na dia efa nampahafantarina ny be sy ny maro azan y maha kandidà an’i Andry Rajoelina dia nisafidy ny hanohana an’i Camille Vital amin’izany fifidianana izany izy ireo. Tapaka tanteraka ny maha mpomba an-dRajoelina ny antoko Leader Fanilo. Mazava izany tamin’ny alalan’ny fanampahan-kevitry ny mpandrindra nasionalin’izany antoko politika izany, tamin’ny faran’ny herinandro teo. Raha ny zava-nisy hatramin’izay nanombohan’ny tetezamita izay no jerena dia tokony tsy hiala amin’ny fanohanana an’i Andry Rajoelina izy ireo raha milatsaka ho fidina ity farany. Tsy izany anefa ny zava-nitranga tamin’ity fivorian’ny mpandrindra nasionalin’ny antoko Leader Fanilo ity fa nisafidy kandidà hafa izy ireo, izay tsy iza fa ny praiminisitra teo aloha Camille Vital.

Tsiahivina fa isan’ireo antoko nasavoritaky ny fiatrehana fifidianana ny Leader Fanilo. Teny am-boalohany tokoa mantsy, dia efa nisy ny filazan’ity antoko ity fa andray anjara feno amin’ireo ambaratongam-pifidianana hisy eto amin’ny tany sy ny fanjakana. Efa nisy ny fotoana izay niheveran’ity antoko ity hanolotra olona ho fidina amin’izao fifidianana filoham-pirenena izao. Tsy nahita marimaritra iraisana hatrany anefa ny mpikambana, indrindra teo amin’ny fanendrena izay olona hatao kandidà amin’izany fifidianana izany. Taorian’izay dia efa nisy ihany koa ny ampahany tamin’ireo mpikambana ao amin’ny antoko no efa nitonona ny hanohana kandidà samihafa. Isan’izany ireo izay efa nilaza ny hanohana ny kandidà Hajo Andrianainarivelo. Efa nisy ihany koa ny nilaza ny hanohana an’i Edgard Razafindravahy. Na izany na tsy izany dia afaka nanambatra ny heviny ihany amin’izao fotoana izao ireo mpikambana ka nisafidy ny hanohana ny kandidà Vital. Tsy mahagaga ihany koa izany rehetra izany satria ho an’ny antoko goavana to any Leader Fanilo dia tsy fanao loatra ny manohana olona mivadibadin-kevitra toa an-dry Andry Rajoelina satria mety hampitondra faisana ny antoko sy ny firenena manontolo ny olona toy izany.