Tany tsy misy fanjakana ?

08/05/2013

Mbola misy mpitantana ve sa tsia ny tananan’Antananarivo? Izay no fanontaniana teo am-bavan’ny maro manoloana ireo tranga miha-mahazo vahana tato ho ato teto amin’ity renivohitr’i Madagasikara ity. porofon’izany ny fametrahan’olo tsy fantatra ilay famerana hafainganam-pandeha (casseur de vitesse) tetsy Ankorondrano. Talanjona ny mpanara-baovao tamin’ny fandrenesana tamin’ireo haino aman-jery ny filazana fa tsy fantatry ny fiadidiana ny tananan’Antananarivo izay antony sy izay tompon’antoka tamin’ny fametrahana ireo famerana ny hafainganam-pandeha (casseur de vitesse) teo amin’ny lalana eny Ankorondrano, tsy lavitra ny Fiangonana Jesosy Mamonjy sy ny orinasa Henri Fraise.

Raha tsiahivina dia tamin’ny faran’ny herinandro teo no nisy nametraka izany “casseur de vitesse” miisa roa teo amin’io toerana io izany. Mazava loatra fa niteraka fanakianana maro dia maro indrindra ireo mpitatitra sy ireo mpitondra fiara mandalo amin’izany lalana izany ity famerana ny hafainganam-pandeha ity satria niteraka fitohanan’ny fiarakodia izay tsy izy teo amin’io faritra io izany. Ankoatr’izay dia tsy vitsy ihany koa ireo nametram-panontaniana mikasika ny antony marina nametrahana izany “casseur de vitesse” izany, raha tsy hilaza afa-tsy ny maha lalana fampiasan’ny filohan’ny tetezamita sy ny filohan’ny Kongresin’ny tetezamita azy isika.
Matoatoa ve?
Ny tena nahagaga tamin’ity raharaha ity dia ny tsy fahafantarana hatramin’izao izay teny tompon’antoka tamin’ny fametrahana izay foto-drafitrasa izany teo amin’io toerana io. Raha tarafina tamin’ny resaka nandeha tamin’ny haino aman-jery tamin’ny fiandohan’ny herinandro teo dia nilaza ho tsy nahafantatra izay tompomarika tamin’izany ny avy ao amin’ny fiadidiana ny tananan’Antananarivo. Raha araka ny tokony ho izy anefa dia tsy misy afa-tsy ny ministeran’ny Asa vaventy sy ny fiadidiana ny tanana irery ihany no afaka mikitika ny fotodrafitrasa toy ireny, sy manme alalana amin’ny fanaovana izany. Mahagaga ary raha nilaza ho tsy nahafantatra izany ny fiadidiana ny tanana.
Na izany na tsy izany, taratry ny tsy fisian’ny fifehezana intsony ny tanana eto amin’ity renivohitr’Antananarivo ity iny tranga iny. Ny tsy fahafantarana ny tompon’antoka tamin’izany fametrahana “casseur de vitesse” izany dia porofo ilazàna fa efa tsy misy mpanara-maso intsony ny toe-draharaha eto amin’ity tanana ity. Misy mihintsy azan y milaza fa efa any amin’ny resaka propagandy no imatimatesan’ny mpitondra ny tanana amin’izao fotoana izao fa tsy amin’ny raharahan’ny tananan’Antananarivo intsony. Tsara ny manamarika fa efa nesorina, omaly ireo “casseur de vitesse” ireo ary ny avy ao amin’ny fiadidiana ny tananan’Antananarivo no nanesotra izany.