Mbola tsy manana trano hiasana

08/05/2013

Araka ny efa fantratry ny mpanara-baovao maro dia tamin’ny alatsinainy teo no nisokatra ny fe-potoana hahafahan’ny mpilatsaka ho fidina ho solombavambahoaka mametraka ny fangatahany ho isan’ny kandidà. Eny anivon’ny farim-pifidianana izay hirotsahany no hametrahany izany atontan-taratasy filatsahan-ko fidina izany. Toy ny zava-misy eto Antananarivo hatramin’izao ora hanoratana izao dia mbola tsy tomombana ihany koa ny fandraisana ny filatsahan-kofidin’ny kandidà raha ny any amin’ny distrikan’i Toamasina voalohany no rehasana. Raha nanontaniana ny tompon’andrikitra momba izany tany an-toerana dia nilaza fa mbola eo am-pikarakarana ny birao hisy izany izy ireo amin’izao fotoana izao. Voalaza fa ny ivotoerana nisy ny fitiliana ny otrik’aretina Sida teo aloha tao an-tampon-tananan’i Toamasina no hametrahana izany toerana fandraisana ny taratasim-pilatsahan-ko fidin’ny kandida izany.

Soa ihany fa hatramin’ny omaly dia tsy mbola nisy aloha ny kandida nanatitra ny filatsahan-kofidiany Efa nisy kosa ireo nitady fanazavana mikasika ny antontan-taratasy ilaina amin’ny filatsahan-ko fidina solombavam-bahoaka. Marihina fa araka ny fanazavan’i Angelo Rakotonanahary, filohan’ny vaomieram-pifidianana Atsinanana (CER) Toamasina I dia ny andininy faha-28 amin’ny lalàna fehizoro laharana 2012-016 ny 01 febroary 2012, mikasika ny firotsahana ho fidiana ho solombavambahoaka no milaza fa eo anelanelan’ny 06 ka hatramin’ny 26 mai no handraisana ny filatsahan-kofidiana solombavambahoaka. Ireto avy ny taratasy ilaina amin’izany: “fanambarana an-tsitra-po, ny filazam-piterahana na dika mitovy amin’ny kara-panondro, ny maha-tera-tany Malagasy, ny casiers judiciaire, dika atao anaty kapila mangirana ny endriky ny vato, ny taratasy fandoavana ny sandam-panamboarana ny vato izay 400.000 Ar ny sandany farany ambany, ary ny fanambarana tsy misy fitaka ny fandoavan-ketra”, izay samy atao dika efatra avokoa.
Ankoatr’izay dia misy fepetra ihany koa takiana amin’ireo kandida. Isan’izany ny maha tsy maintsy feno 21 taona azy amin’ny datim-pifidianana sy ny maha tera-tany Malagasy azy ary ny maha voasoratra azy ao anatin’ny lisi-pifidianana ka manana zo feno ara-politika. Tsy voafetra kosa ny toerana azon’ny olom-pirenena hirotsahany, saingy ireo kandida dia tsy afaka mirotsaka amin’ny toerana maromaro na anaty lisitra maromaro.
Raha ho an’ny faritra Atsinanana, dia miisa valo ny depiote hofidiana: Toamasina I no hanana solombavam-bahoaka roa, iray avy kosa ho an’i Toamasina II, Brickaville, Vatomandry, Mahanoro, Antanambao Manampontsy ary Marolambo. Ankoatra ireo kandida, dia samy hanana ny mpisolo toerana telo ireo manana depiote roa. Roa kosa ho an’ireo depiote iray, ary maimaim-poana avokoa ny fikarakarakana ny antontan-taratasy rehetra ho an’ireo te-hokandida rehetra.