Voaantso eny Ambohitsirotra ireo mpitarika

05/11/2012

Naharay fiantsoana azy ireo ho tonga eny amin’ny biraon’ny fiadidiana ny tetezamita eny Ambohitsirotra ny filohan’ireo fikambanana pedagojika eny amin’ny Anjerimanontolo eny Ankatso. Androany maraina no handraisana azy ireo eny an-toerana araka ity fiantsoana ity. Mbola voatana eny am-ponja kosa ireo naman’izy ireo miisa fito ary hatolotra ny fitsarana anio tolak’andro kosa ny efatra hafa, raha efa nanome baiko ny hamahana faran’izay haingana ity olana ity ny filohan’ny tetezamita. Mbola tsy azo vinavinaina hatreto izay tena ho votoatin’ny fihaonana eo amin’ny fiadidiana ny

tetezamita sy ny solon-tenan’ireo fikambanan’ny mpianatra avy amin’ny toeram-pampianarana isan’isany avy eny Ankatso, izay hatao androany maraina araka ny fiantsoana iretsy farany.Raha ny nambaran’ny iray tamin’ireo filohan’ny fikambanana pedagojika ireo, omaly, dia mety ahakasika ny famahana ny olana mahakasika ny fitakiana ny vatsim-pianaran’izy ireo, sy mahakasika ireo mpianatra voasambotra ary ny disadisa eo amin’izy ireo sy ny zandary izany fihaonana izany. Ny loharanom-baovao avy amin’ireo mpianatra no nahafantarana fa nahazo fiantsoana avy any amin’ny fiadidiana ny tetezamita izy ireo ary androany maraina no iandrasana azy ireo eny Ambohitsirotra. Taorian’ny nazoana izany fiantsoana izany dia efa nisy ny fihaonana teo amin’izy ireo samy izy, izany hoe ireo samy filohan’ny fikambanana pedagojika nandinihana ny fiatrehana izany fiantsoana eny Ambohitsirotra izany.
Marihina fa efa nanome baiko ny amin’ny hitadiavana vaha-olana faran’izay maika amin’ity raharaha fitokonan’ny mpianatra eny Ankatso ity ny filohan’ny tetezamita. Ny vaovao avy eny an’ivon’ny ministeran’ny Fampianarana ambony sy fikarohana siantifika anefa dia milaza mazava tsara fan a eo azan y hamehana dia mety tsy mbola ahitam-bahaolana ao anatin’ny andro vitsivitsy ny fandohavana ny vatsim-pianaran’ny mpianatra nohon’ny fanarahana ny fombafomba rehatra fanao amin’izany. Voalaza ihany koa fa tsy amin’ny alalan’ny vola fampandehna-draharaha toy ny mahazatra no hanomezana ny vatsim-pianarana ka mety tsy ho mora ny kirakira ara-taratasy hatao amin’izany.
Etsy an-danin’izany rehetra izany dia mbola isan’ny olana iray lehibe eo amin’ny fitondrana tetezamita sy ireo mpianatra ihany koa ny fisian’ireo mpianatra izay nosamborin’ny mpitandro filaminana ary naiditra am-ponja nandritra ny hetsika izay nataon’izy ireo tamin’iny herinandro iny. Hisy ihany koa, androany tolak’andro ireo mpianatra izay halefa ho tsarain’ny fitsarana eny Anosy.
Tsiahivina fa tsy sambany akory no nisy fiantsoana na fihaonana toy izao teo amin’ireo solontenan’ny mpianatra eny Ankatso sy ny tompon’andraikitra avy ao amin���ny fiadidiana ny tetezamita. Iaraha-mahalala anefa fa tsy nitondra tamin’ny fampandehanana an-tsakany sy an-davany ny taom-pianarana anefa ireny fihaonana ireny.