Tokony hametram-pialàna ny CES

11/05/2013

Mitaky ny fametraham-pialàn’ny fitsarana manokan’ny Fifidianana ihany koa ny mpisolovava Willy Razafinjatovo, na i Maître Ôlala. Nambarany fa tsy fanarahan-dàlana goavana no nataon’ny CES. Etsy an-danin’izany dia nambarany fa ara-dàlana ny fankatoavana ny filatsahan-ko fidin’i Didier Ratsiraka sy ny an’i Lalao Ravalomanana. Nanao valan-dresaka ho an’ny mpanao gazety tany Taolagnaro, omaly ity mpisolovava, miara-dia amin’ny kandidà Pierrot Rajaonarivelo ity.

Very hasina tanteraka. Tsy lefitry ny an-kamaroan’ny Malagasy, indrindra ireo mpahay làlana sy ireo mpanao politika ny fihetsika nataon’ny CES tamin’ny fandraisana ny filatsahan-ko fidin’i Rajoelina izay ivelan’ny fepotoana hahafahana manao izany. Nampaka-peo ihany koa amin’izao fotoana izao ny mpisolovava Willy Razafinjatovo izay tsy zoviana amin’ny maro intsony noho ny fandraisany anjara amin’ny fanehoan-kevitra amin’ny zava-mitranga eto amin’ny firenena hatramin’izay. Ho an’ity mpisolovava ity dia tsy fanarahan-dalana anisan’ny tena goavana iny nation-dRajoelina sy ny CES iny. “Na inona fanazavan’ny CES dia tsy maharesy lahatra ny mpanara-baovao izany. Ny mety amin’ity andrim-panjakana iray ity dia ny mametram-pialana raha tiana hisy marina ny fifidianana madio eto amin’ny firenena”, hoy ny fanamarihany. Notsiahiviny ihany koa fa efa naneho ny heviny ary nitsikera sady tsy nankasitraka tanteraka izany fihetsiky ny CES izany ihany koa ny sendikan’ny mpitsara eto Madagasikara.
Tsy misy olana ny fodin-dRavalomanana
Ankoatr’izay dia naneho ny heviny manoloana ny filatsahanko fidin’ny kandidà Didier Ratsiraka sy ny an’i Lalao Ravalomanana ihany koa i Mâitre Willy Razafinjatovo. Nambarany fa zon’izy mianadahy mianaka ireo ny milatsaka. “Tsy an’olontokana, hoy izy, ity firenena Malagasy ity. Tsy izy ireo no tsy te-ho tonga teto Madagasikara tamin’ny fotoana tokony nahahatongavany fa noho ny NOTAM nomen’ny fitondrana FAT azy ireo. Any amin’ny fitondrana nanakana azy ny fahadisoana, raha misy izany.
Nitondrany fanazavana ihany koa ny momba ny fodian’ny filoha teo aloha RAVALOMANANA Marc. Tsy misy olana ny fiverenany eto an-tanindrazana, rah any fahitany azy. Raha nanontanian’ny mpanao gazety kosa ny tenany mahakasika izay olona tokony ho filohan’ny repôblika. Valiny: olona matotra, manam-pahaizana, matahotra an’Andriamanitra, manana fitondrantena mendrika. Fadisoan-kevitra ny filazana fa tanora no tokony hitondra, hoy ny hevitr’ity mpahay làlana ity. Mila olona za-draraha hitondra ity firenena ity. Noraisiny ho ohatra tamin’izany ny fitondran’ny tanora nandritra ity tetezamita ity. “Voaporofo fa mijaly fahadiranovana ny vahoaka, halatra sy tsy fandriam-pahalemana no manjaka”, hoy ny fanazavany.
Marihina fa nandritra ny diany tany Toalagnaro no nihaonan’i Maître Willy Razafinjatovo tamin’ny mpanao gazety tany an-toerana ity. Fitsidiam-paritra izay tafiditra amin’ny fandresen-dahatra ny vahokan’Anôsy mikasika ny fahitana ny kandida tohanany ho filohan’ny repôblika amin’ny fifidianana hatao amin’ny faha-24 jolay izao. Tsy iza izany fa ny kandidàn’ny MDM, Pierrot Rajaonarivelo izay hitsidika any an-toerana androany sabotsy, miaraka amin’ny mpanakanto vavy amin’iny faritra iny sy ny tarika Rabaza.