Mampitandrina sahady

14/05/2013

Nozaraina nanomboka omaly ny vola notakian’ireo mpiraki-draharaha izay anton’ny fitokonan’izy ireo. Hiverina handray ny asany arak’izany izy ireo manomboka amin’ity androany ity, araka ny nambaran’ny filohan’ny sendikan’ny mpiraki-draharaha. Na izany na tsy izany dia mbola nanamafy ihany koa ny mpiraki-draharaha fa mbola maro ny fitakiana tsy maintsy hataon’izy ireo, ka isan’izany ny hamaritana dien’izao ny fampidirana ao anatin’ny « bon de caisse » n’izy ireo an’ity vokatry ny fangatahana nataony ity. Mitaky sahady ny hampidirana ny vokatry ny fitakiana nataon’izy ireo ho ao anatin’ny karaman’izy ireo isam-bolana manomboka amin’ny volana jolay ho avy izao ireo mpiraki-draharaha izay namarana ny fitokonany omaly ary handray ny asany amin’ity androany ity.

Azo lazaina fa tsy mbola tsy nivaha tanteraka arak’izany ny olan’ny mpiraki-draharaha ary mbola azo heverina ny hisian’ny fitokonan’izy ireo afaka volana vitsivitsy raha sanatria ka tsy tafiditra ao amin’ny « bon de caisee » n’izy ireo manomboka amin’ny volana jolay 2013, ireo tambinkarama samihafa izay efa nomena nanomboka omaly.
Marihina fa araka ny fanambarana nataon’i Rabenandrasana Nicolas, filohan’ny sendikan’ny mpirakidraharaha eto Madagasikara dia hiverina hiasa manomboka amin’ity androany ity izy ireo. Ny antony dia satria efa nanomboka nandoha ny vola nifanarahana, dia ny 100 000 ariary isam-bolana ho azy ireo ny ministeran’ny Fitsarana. Efa nisy ny naharay an’izany omaly. Marihina fa vola manandrify ny telo volana isam-bolana , izany hoe 300 000 isaky ny mpiraki-draharaha no nomen’ny ministeran’ny Fitsarana. Lela vola no nomena azy ireo, araka ny loharanom-baovao ihany, ary mbola tsy nisoratra any amin’ny « bon de caisse » izany, noho ny maha vola avy amin’ny ministera azy. Izay antony izay no nilazan’izy ireo fa tokony efa hijery haingana izay hamoahana ny làlana mamindra ny fandohavana an’ity vola ity avy amin’ny ministeran’ny Fitantanam-bolampanjakana ny tompon’andrikim-panjakana. Raha tsy izay dia mety ho tapaka manomboka amin’ny volana jolay indray ny fanomezana an’ity vola ity. Izay antony izay no nafahana nilaza fa mbla tsy tonga amin’ny tena notadiaviny ny mpiraki-draharaha.
Olana goavana
Nomarihan’ny filohan’ny sendikan’ny mpiraki-draharaha fa nisy vokany ratsy teo amin’ny fampandehanana ny raharaham-pitsarana manerana ny Nosy ny fitokonan’ny mpirakidraharaha. Ho an’ny fitsarana ambataronga voalohany any Toamasina, ohatra, dia antontan-taratasin’ady manodidina ny 40 eo ho eo (na ady heloka io na sivily), no miditra fotoam-pitsarana nefa niantona avokoa. Marihina ihany koa fa efa niahiahy ny lehiben’ny fampanovana ambony ao amin’ny fitsarana ambony ao Toamasina ny amin’ny mety tsy hahavitan’ny fitsarana ady heloka be vava tsotra (CCO) izay vao hanomboka ny andiany voalohany, ary efa tara ny tokony nisiany noho ny tsy fahazoana teti-bola avy amin’ny ministera ny fitsarana hanaovana izany. Ny datin’ny 03 jona izao no heverin’ny fitsarana ambony hanombohana izany ka raha sanatria tsy niverina niasa ny mpiraki-draharaha dia mety tsy tanteraka izany. Hiteraka olana amin’ny fonjaben’i Toamasina anefa ny zava-misy satria efa hifarana avokoa ny ankamaroan’ny fotoam-pihazonana vonjy maika (MD) ireo jiolahy mpanao heloka be vava ao Ambalatavoahangy, izay 09 volana miampy 03 volana ny voalazan’ny lalana. Tsy maintsy hikaroka vahaolana maharitra amin’ity raharaha ity arak’izany ny fitondram-panjakana raha toana ny tsy hiverenan’ny fasahiranana ateraky ny fitokonana toy izao.