Potika ny kianjan’Ampasambazaha

15/05/2013

Niato efa andro maro dia maro ny fanarenana ny kianja filalaovam-baolina any Ampasambazaha Fianarantsoa. Fampanantenana nataon’ny filohan’ny tetezamita ny hanarenana ity kianja ity ary efa nisy tokoa ny vola nalefan’ny fiadidiana ny tetezamita hanaovana ny asa. Noho ny tsy fahatontosan’’izany famatsiam-bola izany hatramin’ny farany dia nijanona ny asa. Miteraka olana eo amin’ny fanatontosana ny fanadinana ara-panjakana ataon’ny mpianatra amin’ity taona ity anefa ny tsy fahavitan’ny asa satria io no kianja fandraisana ireny fanadinana ara-panatanjahan-tenan’ny mpianatra ireny. Voatery mitady vahaolana vonjimaika ny mpikarakara ny fanadinam-panjakana any an-toerana.

Niteraka fahasahiranana goavana ho an’ny tompon’andrikitra any an-tampon-tananan’i Fianarantsoa amin’izao fotoana izao ny fampanantenana poak’aty nataon’ny Filohan’ny tetezamita tamin’ny fandalovany tany amin’izany tanana izany, volana maro lasa izay. Nampanantena ny hanarina ny kianjan’Ampasambazaha ny tenany tamin’izany ary nilaza fa ao anatin’ny volana vitsy monja dia ho vita ny asa fanarenana. Mazava loatra fa nisy tokoa ny fanombohana izany asa fanarenana izany, ka isan’ny efa natao ny fandravana ny ampahany betsaka tamin’ireo foto-drafitrasa efa teo mba ahafahana manangana ny foto-drafitrasa nampanantenain’ingahy Filoha. Toy ireo tranga maro tamin’ny faritra samihafa teto amin’ny firenena anefa dia tsy naharitra araka ny tokony ho izy ihany koa ny famatsiam-bola avy amin’ny fiadidiana ny tetezamita. Izany hoe ny fandravana ireo foto-drafitrasa kasaina hovana ihany no vitan’ny vola nomen-dRajoelina fa ny tena fanarenana kosa tsy nisy mandrak’izao. Vokany: mbola tsy azo ampiasaina mihintsy ny kianjan’Ampasam-bazaha amin’izao fotoana izao. Tsy azo atao ao amin’ity kianja ity, arak’izany ireo fanadinana ara-panatanjahan-tena izay fanao tao hatramin’izay. Torak’izany koa ireo hetsika ara-panatanjahantena maro samihafa izay voatery naato na natao tany amin’ny toeran-kafa.
Atao any amin’ny toeran-kafa
Omaly dia nanao fanambarana mikasika ny fandraisan’andraikitra noraisina manoloana ity tsy fahafahana mampiasa ny kianjan’Ampasambazaha ity ny lefitra faharoan’ny delegasiona manokan’ny tananan’i Fianarantsoa, Jean Brutho Raharison. Nambarany fa tsy maintsy hisy ny fanadinana ara-panatanjahan-tena ho an’ireo mpiadina amin’ny fanadinana ara-panjakana amin’ity taona ity. Tsy nambarany kosa ny toerana hanaovana izany. Araka ny fanazavany dia ny lehiben’ny farim-piadidiam-pampianarana no hanambara ny toerana handraisana ireo fanadinana fanatanjahan-tena ireo, androany. Araka ny hevitry ny maro dia mety hindrana kianja amin’ireo sekoly tsy miankina amin’ny fanjakana izy ireo hanatontosana ny fanadinam-panjakana ara-panatanjahantena.