Hitokona sy hanakan-dàlana

15/05/2013

Tantara mitohy ny raharaha manodidina ny tsy fahavitan’ny asa fanarenana ny lalam-pirenena faha 5 mampitohy an’i Toamasina sy Mahavelona Foulpointe. Araka ny fantatra dia tapa-kevitra ny hanao fihetsiketsehana fanoherana ny zava-misy izay mianjady amin’ny asan’izy ireo amin’izao fotoana izao ireo mpanao fitaterana amin’izany lalam-pirenena izany.

Fanakanana ny lalam-pirenena faha 5 ary mety hitatra hatramin’ny fanakanana ny lalam-pirenena faha 2, miampy fitokonana tsy hanao ny asany no heverin’izy ireo fa hatao amin’izany.
Raha tsiahivina dia tsy mahafaly ireto mpandraharahan’ny fitaterana ireto ny fijanonan’ny asa fanarenana izany lalam-pirenena izany izay efa notrongisina tamin’ny ampahany maro ka nahatonga azy ho ratsy kokoa noho ny teo aloha.
Ny orinasa “Building Material and Civil Engineering (BMCI)” no nanao ny asa fanarenana. Noho ny olana teo amin’ity orinasa ity sy ny MainLand izay namatsy vola ny fanarenana ka nampiato izany famatsiam-bola izany dia nitsahatra ihany koa ny asa. Marihina fa mitentina 1.200 tapitrisa ariary ny tetibola nentina nanamboarana an’ity lalam-pirenena ity. . Efa nisy ny fidinana tany an-toerana in-droa miantoana nataon’ny minisitry ny Asa vaventy mba ho fikaroham-bahaolana amin’ity raharaha ity kanefa tsy nisy vokany izany hatramin’izao. Teo ihany koa ny loabary an-dasy izay natao tao amin’ny lapan’ny faritra Atsinanana ka nandraisan’ireo “comite des sages” Toamasina anjara. Tamin’izany dia samy namoaka ny heviny ny orinasa BMCI sy ny MainLand. Mbola tsy nahitam-bokany ihany koa izany. Nisy ihany koa ny hetsika narahana fitondrana sora-baventy teo anoloan’ny trano fonenan’ny tompon’andraikitry ny MainLand tao Bazary kely izay nataona andiana tanora vitsivitsy naneho ny tsy fankatoavany ny fanapahana ny asa fanarenana ny RN5. Hatreto dia samy very maina avokoa izany rehetra izany satria tsy misy vahaolana matotra. Tsiahivina ihany koa fa na ny filohan’ny FAT aza dia nilaza fa handray andraikitra raha tsy vita io lalana io kanefa nangina tsy naloham-peo ny tenany, 05 volana aty aoriana.

Hihetsika ihany koa ny mpandraharaha

“Feno ny rano. Efa tsy rariny intsony zava-misy. Tany tsy misy fanjakana ny eto amintsika ka hararaotin’ireo vahiny mpangoron-karena fotsiny”, izay no nambaran’ireo mpitatitra mpampiasa ny RN5, raha nilaza ny tsy fahafaliany manoloana ity raharaha ity izy ireo. Marihina fa ankatoky ny vanim-potoanan’ny fialan-tsasatra lehibe isika amin’izao fotoana izao. Fotoana izay fahatongavan’ny mpizahatany sy vahiny maro any amin’izany faritra izany ary mahatsara ihany koa ny asan’ny mpitatitra any an-toerana. Rariny arak’izany raha manaitra ny sain’ny tompon’andraikitra manoloana ny zava-misy izy ireo. Araka ny vaovao hafa dia fantatra ihany koa fa nanao fivoriana tao Mahavelona Foulpointe ireo mpandraharaha ara-pizahantany avy amin’ny faritra Atsinanana ka araka ny tapak’izy ireo dia hisy ny hetsika ho hataon’izy ireo ihany koa ho fanarenana ireo lalana tena simba.