Rakotra valala

16/05/2013

Tafakatra ao antampon-tananan’i Fianarantsoa amin’izao fotoana izao ny andiam-balala. Omaly dia rakotra tanteraka ny tanana, raha araka ny loharanom-baovao avy any an-toerana. Nanomboka tamin’ny iray ora tolakandro eto ho eo no nahatongavan’izany andiam-balala matevina izany. Avy any avaratra ny fihaviany ary nihodikodina teo amin’ny habakabak’i Fianarantsoa izany andiam-balala matevina dia matevina izany nandritra ny ora vitsivitsy, talohan’ny nipetrahany tamin’ny faritra maro dia maro tany an-toerana. Marihina fa tsy sambany akory no nahatongavan’ny andiam-balala ny tao an-tampon-tananan’i Fianarantsoa. Tamin’ny asabotsy te odia efa nahitana andiam-balala ihany koa tany an-toerana saingy tamin’ireo faritra somary manodidina ny tanana no lasibatra. Trano maro no voalaza fa rakotry ny valala tanteraka omaly, raha araka ny vaovao avy any an-toerana ihany. Isan’izany ny tao amin’ny fokotanin’Anjoma izay nampanano sarotra mihintsy ny fifamezivezena vokatry ny hamaroan’ny valala.

Hatramin’ny ora nanoratana ny lahatsoratra dia mbola tsy fantatra izay fandraisan’andrikitry ny fitondrana hiadiana amin’ity andiam-balala tafakatra ao antampon-tananan’i Fianarantsoa ity. Araka ny fanazavan’ny talen’ ny fampandrosoana ny eny ambanivohitra any amin’ny Faritra Matsiatra ambony, taorian’ny fandalovan’ilay andiam-balala tamin’ny asabotsy te odia tsy manana ranom-panafody hahafahana miasy amin’ny valala manidina izy ireo afa-tsy ranom-panafody mahafeno velaran-tany 400ha ihany. Ho an’ny kijeja kosa dia ranom-panafody maharakotra velaran-tany 1500 ka hatramin’ny 2000 ha ihany no eo am-pela-tanan’izy ireo. Raha araka ny vinavina anefa dia velaran-tany mahery lavitra noho izany no rakotr’ireo andiam-balala ireto.
Amin’ny Septambra vao hisy fanampiana
Ho an’ny mponina kosa dia tsy hitan’izy ireo ny hatao manoloana izany tranga izany. Mazava loatra fa misy ihany ny faly manoloana izany firongatry ny andiam-balala izany satria azoa tao laoka hihinanam-bary izany valala izany ho an’ny sasany. Tsy vitsy kosa anefa ny velon’ahiahy noho ny fahasimban’ny voly izay mety aterak’izany. Marihina fa efa tafakatra ny an-kamaroan’ny vary raha ny any amin’iny faritra iny no resahina.
Ho an’ny ministeran’ny Fambolena kosa dia fantatra araka ny nambaran’ny minisitra Ravatomanga Roland fa amin’ny volana septambra ho avy io vao azo hampiasaina ny vola avy amin’ny mpiara-miombon’antoka hiadiana amin’ny andiam-balala eto Madagasikara. Ny fanarahana ny fombafomba amin’ny famoahana izany vola izany avy amin’ireo mpamatsy vola no voalaza fa anton’izany tsy fahafahana mampiasa ny vola amin’izao fotoana izao izany. Na izany aza dia efa nisy ihany ny fangatahan’izy ireo ny mba hamoahana fanampiana vonjy maika an’i Madagasikara hiatrehana ny firongatry ny andiam-balala amin’izao fotoana izao.