Miha-enjana ny disadisa

16/05/2013

Mbola tsy nahitana marimaritra iraisana hatramin’izao ny disadisa izay misy eo amin’ireo komitin’ny mpivarotra sy ny mpivarotra sasantsasany ao amin’ny bazariben’i Toamasina.

Araka ny vaovao avy any an-toerana dia nitondra ny valin-kafatra manoloana ny fanankianana niantefa tamin’izy ireo ny komity izay voalaza fa efa lany daty, tamin’ny alalan’ny filohany Razafiharimanana Emelie, filohan’ny fikambanan’ny mpivarotra. Nambaran’ity farany fa “tsy vahaolana ny fanisàna vaovao heverina fa hatao satria efa tsy ny isa voarakitra tamin’ny fanisana nandritra ny famindrana ireo mpivarotra intsony no misy amin’izao fotoana izao, noho ny fahamaroan’ireo mpivarotra vaovao naka toerana tamin’ny tsena vonjy maika ankehitriny”. Nomarihan’ity filohan’ny mpivarotra ity ihany koa fa “ny hisavorovoron-kilantoana ary ny hevitry ny maro ihany koa mahataka-davitra, ka raha iarahan’ny mpivarotra rehetra miaiky fa ny fananganana ny ‘comite ad’hoc’ hisian’ny fiaraha-mitantanana no hahatsara ny fihavanan’ny samy mpivarotra dia tsy hitanay komity mihintsy ny olana. Fa ho anay, tsy azo ekena ny tsy fanarahana ny lisitra efa nifanarahana sy vita sonia niarahan’ny mpivarotra rehetra sy ny kaominina ary ny mpanamboatra ny tsena vaovao”.
Ankilan’izany, dia nomarihan’ny filohan’ny fikambanan’ny tsena ity hatrany fa “ny olana eo amin’ireo mpivarotra manohitra anay komitin’ny tsena bazary be ireo dia ny filazana fa lany fetr’andro ny mandànay, nefa tsy izahay no nidongy ho mpitantanana fa ny kaominina tamin’ny alalan’ny Pds lefitra voalohany no nilaza ny mbola maha ara-dalana anay aloha, satria tsy hisian’ny kotrontana amin’ny fandaminana dia ny ben’ny tanana vaovao voafidy eo no manao ny fandaminana rehetra noho ny mandan’ny komitin’ny tsena rehetra eto Toamasina tapitra ny 2012 avokoa”. Ankoatr’izay, dia nilaza ireo mambra ny komtin’ny tsena bazary be fa hanomana fivoriam-be izy ireo tsy ho ela, hamaritra ny rafitra fiaraha-mitantanana ny mpivarotra araka ny fangatahan’ny mpivarotra “sasany”, saingy nomarihan’izy ireo fa tsy rava ny komity misy ankehitriny satria izy ireo no nandamina ny fifindrana koa izy ireo ihany no misahana ny fiverenana amin’ny tsena vaovao, hialana amin’ny olana mety hitranga.