Mampikony indray no lasibatra

17/05/2013

Ankizy mpianatra miisa 9 avy amin’ny sekoly tsy miankina iray any Mampikony no indray azon’aretin-tsi fantatra omaly nandritra ny taranja fanatanjahan-tena izay natrehan’izy ireo. Nentina tany amin’ny dokotera avy hatrany izy ireo raha vao nitranga ilay haretina saingy tsy hitan’ny mpitsabo izay natao. Nirotsaka an-tsehatra nanao ny asany ihany koa ny pastera sy ny mpitondra fivavahana any an-toerana. Eo anatrehan’izany dia mandeha sahady ny resaka any an-toerana izay milaza fa tonga any amin’ity tanana ity ny fikambanana « satanika » Taorinan’Antsirabe sy Manakara ary Moramanga dia ny tananan’I Mampikony indray amin’izao fotoana izao no handrenesana ny fisian’ny trangan’aretina izay kilasian’ny maro ho vokatry ny asan-demony. Araka ny vaovao avy any an-toerana dia nandritra ny fotoanan’ny fanatanjahan-tena tao amin’ny kilasy faha enina tao amin’ny sekoly tsy miankina iray tany Mampikony, omaly maraina no nitrangan’ity raharaha ity.

Ireo vavolombelona no nilaza fa izay mpianatra nandingana teo amin’ilay tsato-by iray izay fametrahana jiro tao amin’ny kianja fanaovana fanatanjahantena dia nidaraboka sy safotra avokoa. Niisa enina no tratran’ity hareti-tsy fantatra ity izay nentina avy hatrany tany amin’ny dokotera avokoa. Mazava loatra fa nandray an-tanana avy hatrany ny fikarakarana azy ireo ny dokotera saingy, raha araka ny vaovao ihany dia tsy nisy vokany loatra izany. Nantsoina indray avy eon y pasitera ka ity farany no nahatsikaritra fa asan-demony ity tranga ity. Nisy tamin’ireo ankizy safotra ireo no nahatsiaro tena rehafa tamin’ny hariva. Ireto farany no nitantara ny nanjo azy ireo. Tsy dia nazava loatra anefa ny fitantarana satria na izy ireo aza dia tsy afa-nanazava araka ny tokony ho izy ny zava-nitranga. Ny hany nambarany dia ny fisian’ny hery hafa izay nisintona azy ireo. Tsy fantatra kosa anefa na nisintona azy ho aiza na ho aiza izany hery hafa izany.
Mazava loatra fa niparitaka vetivety tao an-tampon-tananan’i Mampikony ity tranga ity, omaly. Ho an’ny maro dia ireo tranga voalaza fa satanika toy izay nitranga tany Antsirabe sy Manakara ary Moramanga no tonga any an-toerana. Tsiahivina fa mpianatra maro dia maro no tratry ny areti-tsy fantatra tamin’ireo tanana ireo volana vitsivitsy lasa izay. Tsy mbola voafaritra mazava anefa hatramin’izao izay tena marina tamin’ireo zava-nitranga ireo.