Mpandraharaha Sri lankais voasambotra

06/11/2012

Notapahan’ny mpitandro filaminana ny lalana manodidina ny trano nisy ilay mpandraharaha Sri Lankais tao Ambatondrazaka ny Asabotsy tolakandro lasa teo. Nosamborin’izy ireo ny alin’iny ihany ity teratany vahiny mpividy safira ity sy ny vady aman-janany. Tsy fangtatra kosa ny toerana nitondrana azy. Ny mpitandro filaminana iray tany an-toerana no nanazava fa disadisa nateraky ny fivarotana safira 32 g izay lasan’ity mpandraharaha vahiny ity no anton’ireo rehetra ireo. Mbola voaporofo indray arak’izany fa tsy marina ny filazana fa efa foana ny fitrandrahana safira any Didy. Voaporofo ihany koa fa ireo mpitrandraka madinika no noroahina tao amin’ity toerana ity, fa mbola manao izay danin’ny kibony kosa ireo mpitrandraka vaventy miaraka amin’ireo mpitandro filaminana miaro azy ireo.

Nihorohoro ny mponina manodidina ny lalana mihazo ny Pharmacie Odin’Alaotra sy ny tranombarotra Lambamihaja, samy ao an-tampon-tananan’Ambatondrazaka ny asabotsy lasa teo, nanomboka ny tolak’andro. Nobahanan’ny mpitandro filaminana notarihana manamboninahitra iray avy aty Antananarivo ireo lalana ireo nandritra izany fotoana izany. Niditra tao amin’ny trano nisy ilay mpandraharaha Sri Lankais iray kosa ilay manamboninahitra izay nitarika ireto mpitandro filaminana ireto, ary maromaro ny fivezivezena nataony tao amin’ity trano ity mandram-paharivan’ny andro. Niafara tamin’ny fitondrana ilay mpandraharaha Sri lankais sy ny vady aman-janany moa izany rehetra izany rehefa maizina ny andro.
Marihina fa nanana mpitandro filaminana niambina azy ihany koa ity teratany vahiny ity saingy tsy afa-nanao n’inon’inona izany nanoloana ilay hetsika nisamborana azy tamin’io fotoana io. Ny vaovao teny an’ivon’ny mpitandro filaminana no nilaza fa tsy raharaha mahakasika safira milanja 20 g no anton’izany rehetra izany. Voalazan’ity loharanom-baovao ity fa mpandraharaha iray efa fanta-daza hatrany Ilakaka no tsy faly tamin’ny nazoan’ity teratany Sri lankais ity an’ilay safira 32 g. Io mpividy vato Malagasy io no nanao izay ho afany ka nahatonga an’ireo mpitandro filaminana avy aty Antananarivo nanao ilay « operation » nisamborana ilay teratany Sri lankais. Tetsy an-danin’izay dia efa nisy manamboninahitra ihany koa efa nanome mpitandro filaminana niaro ity teratany vahiny ity saingy tsy afa-nanao n’inon’inona moa ireto farany rehafa tonga tany Ambatondrazaka ireo mpitandro filaminana voalaza tetsy aloha.
Ity raharaha nitranga tany Ambatondrazaka ity no ahafahana milaza mazava fa tsy mbola foana akory ny fitrandrahana safira any amin’ny kaomina Didy, na dia teo aza ny hetsika izay nanesorana ireo mpitrandraka tany an-toerana. Mitombina arak’izany ny filazana fa ireo mpitrandraka madinika ihany no voaroaka tany Didy fa nandimby azy ireo any an-toerana kosa ireo mpitrandraka vaventy tohanan’ireo mpitandro filaminana.