Ho raikitra sa tsy ho raikitra ?

17/05/2013

Ho raikitra ihany ve sa tsia ? Sa ho lasa fanakorotanana ny saim-bahoaka fotsiny ihany ? Izany no fanontaniana mifamahofaho ao antsain’ny maro. Raha ny olon-tsotra maro sendra anay dia samy mitovy ny heviny.

Tsy fantatra marina izay ho tohin’ny raharaham-pirenena. ”Raha ny ahy manokana dia raisiko ho ady an-tranon’ireo mpanao politika no tena hasongadina fa tsy ny raharaham-pirenena izay efa tena mampikaikaika ny vahoaka amin’izao fotoana izao. Tsy misy intsony ny fijerena ireo vahoaka madinika izay efa zara raha misakafo tapa-kibo isan’andro. Araka izany dia milaza aho fa mety tsy ho raikitra io fifidianana io”, hoy Ralaimahefa Fidiarilala, mpiasam-panjakana misotro ronono. Raha ny hevitr’ireo mpivarotra kosa indray dia mahita fangirifirina izy ireo noho ny amin’ny fiakaran’ny vidin’entana tsy mitsahatra sy ireo entana avy any ivelany mitobaka eto an-tanàna. ”Tsy misy fandraisana an-tanana ataon’ireo manam-pahefana mahakasika ny mpivarotra madinika satria dia variana miady seza sy mikajy ny vola hiditra any ampaosiny ny ankamaroany. Kely ny finoaka ny hisin’ny fifidianana”, hoy kosa Ravaohanta Félicienne mpivarotra enta-madinika etsy Analakely.
Fandaminana
“Tsy mora ny manatanteraka fifidianana fa indrindra anatina fotoana fohy toy izao. Mila fandaminana ifotony mihitsy ary indrindra ny fiaraha-miasa fa tsy atao kitrano an-trano”, hoy Alain Georges Rabenarivo ,mpampianatra ao amin’ny sekoly Primavera etsy andavamamba, manamafy. Tsy hijanona ho ahiahy ihany anefa izany fa hita sy miha misongadina amin’ny toe-draharaha misy amin’izao fotoana izao izay efa manakaiky ny fe-potoana izay tokony hametram-pialanan’ireo manana andraikitra ambony eo amin’ny fanjakana. Mandraka androany dia tsy mbola nisy nanatanteraka izany na dia iray aza. Hita fa mifanilika sy toa mitazona ny sezany avokoa izy ireo. Tsy misy na dia iray aza manana fikasana ny hiala sao mantsy very tokoa ny fihinanana. Ny vahoaka ihany no atao kilalao.