Voadaka ambavafo ny Emmo-rég

06/11/2012

Tsy nahazo rariny ireo mpitandro filaminana avy amin’ny Emmo-rég, manoloana ny raharaha fitokonan’ny mpianatra teny Ankatso sy ny fisamborana ireo izay voalaza fa nitarika korontana nandritra izany fihetsiketsehana izany. Sady nanaiky ny hanefa ny vatsim-pianaran’izy ireo ny fididiana ny tetezamita, ary nanaiky ihany koa ny hanafaka ireo mpianatra nosamborin’ny Emmo-rég sy naiditra vonjimaika tany am-ponja.Manao ranolava tato anatin’ny andro vitsivitsy ny fanehoan’ny fitondram-panjakana

tetezamita ny tsy fankatoavany ny fihetsiky ny mpitandro filaminana ao amin’ny Emmo-rég manoloana ireo hetsika samihafa nisy teto Antananarivo. Isan’izany ny famotsorana ireo mpandraharahan’ny fonja izay notondroin’ny Emmo-rég ho mpiray tsikombakomba tamin’ny famakina banky teto an-drenivohitra. Ary dia torak’izany ihany koa ny nitranga omaly, mahakasika ireo mpianatra nosamborin’ireo mpitandro filaminana ireo ary natolony ny fitsarana noho izy ireo voalaza fa nitarika korontana nandritra ny hetsika fitakiana teny Ankatso tamin’ny herinandro lasa. Nandritra ny fihaonan’ny solon-tenan’ny mpianatra avy eny Ankatso tamin’ny Sekretera Jeneralin’ny Fiadidiana ny tetezamita, Resampa Haja sy ny tale jeneralin’ny tetezamita , Ratovomalala Mamy dia efa nanome toky ireto farany fa tsy maintsy votsorana ireo mpianatra voasambotra ireo. Ary dia izany tokoa no tanteraka satria nomen’ny fitsarana fahafahana vonjimaika izy ireo, ary amin’ny alatsinainy 12 novambra no hambara ny didim-pitsarana.
Tsy vitan’izay ihany koa fa nandray fanampahan-kevitra ny handoha ny vatsim-pianaran’izy ireo sy ny fampitaovana ihany koa ny fanjakana Tetezamita. Vatsim-pianarana iray volana no voalaza fa hefaina amin’ity androany ity. Midika izany fa nomen’ny fitondrana tetezamita rariny ihany koa ny hetsika nataon’ireto mpianatra ireto. Io hetsika nankatoavin’ny fitondrana tetezamita io anefa no anton’ny fifandonana teo amin’ny mpianatra sy ny Emmo reg ka nahatonga ireto farany hisambotra mpianatra. Arak’izany dia tsy nahazo rariny tamin’ny fitondrana ihany koa ny famoretana nataon’ny Emmo-reg tamin’ireo mpianatra.
Marihina fa nankasitrahan’ny mpianatra izao fihetsiky ny fitondrana tetezamita izao ary nilaza ny hampiato ny fitokonany izy ireo araka ny nambaran’i Berija Ravelomanatsoa, filohan’ny fikambanana pedagozika eny Ankatso.
Tsiahivina fa mbola nisy ny fihetsiketsehana nataon’ireo mpianatra tamin’ny andron’ny omaly. Fihetsiketsehana izay nataon’izy ireo teny amin’ny faritry ny fiantsonan’ny taxi be eny Ankatso. Toy ny mahazatra dia tonga teny an-toerana ihany koa ny mpitandro filaminana avy ao amin’ny Emmo rég. Nisy vokatr’izany ny fifandonana teo amin’ny andaniny sy ny ankilany. Fifandonana izay niafara tamin’ny fisamborana mpianatra vitsivitsy saingy navotsotra vetivety ihany ireto farany.