Voasazy ilay zanaka sefo fokontany

06/11/2012

Miisa 5 ireo takelaka mpandray herin’aratra avy amin’ny masoandro na « panneau solaire » izay nisy nangalatra tany amin’ny tananan’i Mahaboboka ao amin’ny distrikan’i Sakaraha. Tamin’ny 13 aogositra no nisy nangalatra ireo fitaovana ireo. Tany amin’ny ben’ny tanana amerin’asa no nandehanan’ny ahiahin’ny maro raha vao nitranga izany fahaverezan’ireo fitaovana ireo izany. Saingy rehefa nakarina teo anatrehan’ny fitsarana tao Toliara ny raharaha, ary rehefa nanao fanadihadiana lalina ny fitsarana dia fantatra ihany ny nangalatra izany, izay niaky ny heloka vitany. Tsy iza izany fa ny zanaka lahin’ny sefo fokontany tao Mahaboboka ihany. Nohelion’ny fitsarana higadra 5 taona an-tranomaizina sazy tsy mihantra ity farany noho izany halatra izany.

Marihana fa mamatsy jiro ao amin’ny tananan’i Mahaboboka ireo panneaux solaires ireo. Fikabanana tsy miankina amin’ny fanjakana no angady nananana sy vy nahitana izany, vokatry ny fangatahana nataon’ny ben’ny tanana tany an-toerana. Tapaka nandritra ny volana maromaro arak’izany ny famatsian-jiro tany amin’ity tanana ity taorian’izay halatra izay. Efa niverina amin’ny laoniny kosa izany amin’izao fotoana izao satria nanaiky ny hamerina ireo fitaovana nangalariny ilay voapanga.
Dahalo novonoin’ny miaramila
Mitaky fampiharana ny làlana ny havany
Tany Antsapanimahazo ao amin’ny kaomina Andilanatoby distrikan’Ambatondrazaka no voatifitry ny miaramila avy amin’ny DAS any an-toerana ny lehilehy iray izay voasambotry ny fokonolona noho izy nahatratrarana entana halatra maromaro tao an-tranony. Araka ny loharanom-baovao dia nikasa ny handositra izany lehilahy atao hoe Benindriana izany ka izay no antony nitifiran’ireo miaramila azy. Voalazan’ny loharanom-baovao ihany koa fa samy niaiky ny maha dahalo azy avokoa, n any vady aman-janany n any fokonolona izay nisambotra azy.
Amin’izao fotoana izao dia fantatra fa mampaka-peo ny fianankavian’ity Benindriana ity ary mitaky ny fitsarana sy ny famaizana ireo miaramila izay namono ny havany. Nambaran’ny loharanom-baovao ihany koa fa mandrahona ny vady amanjanak’ity voalaza fa dahalo ity ihany koa ireo fianankaviana ireto nohy izy ireo izay nanamarina fa manao izay asa izany tokoa ity olona novonoin’ny miaramila ity.