Mangataka tolo-tànana ireo namany ao Toamasina

18/05/2013

Mangataka tolo-tànana sy fanampiana ary fiaraha-miasa amin’ireo izay te-hanampy sy tsara sitra-po ary ireo mahatsapa ny fahorian’ireo polisy ao Mananara avaratra, ny polisy naman’izy ireo ao Toamasina amin’ny alalan’ny tale iraisam-paritry ny filaminana anatiny ao Toamasina. Entina hanampiana ireo fianakaviana polisy ao Mananara avaratra izay may sy potika ary rava fananana noho ireo olana nitranga noho ny “fitandroana ny filaminam-bahoaka” tany an-toerana farany teo. Azo aterina ao amin’ny biraon’ny talen’ny filaminam-bahoaka Toamasina na amin’ny kaonty manokana ao amin’ny banky BOA ny fanampiana rehetra, izay foin’ny olona rehetra dia raisin’izy ireo avokoa.

Ankilan’izay, dia lasa tena tsy fanjakana baroa ny ao Mananara avaratra taorian’ny fanakatonana ny kaomisarian’ny polisy tany an-toerana noho ilay disadisa teo amin’ny polisy sy ny “fokonolona”; dia miasa irery ny borigadin’ny zandary izay efa lasa lasibatry ny andian-olona voabaikona mapanao politika koa ankehitriny. Taorian’ilay fitsaram-bahoaka nataon’ireo andian’olona ilay voaroiroy fa namono olona tao Mananara avaratra ny alakamisy, izay teo imason’ny zandary tany an-toerana izay tsy hararesy dohika ireto andian’olona izay efa saika raikitra sakoroka, dia namoaka ilay lehilahy voaroiroy nandalo fanadiadiana nitadiavana ny marina, ka teo no niavian’ilay von’olona. Omaly zoma araka ny angom-baovao avy any Mananara avaratra, dia mbola misy olona roa hafa nanaovan’ny zandary fanadiadiana mikasika ity raharaha von’olona ity hatrany, ka mbola tonga teo anoloan’ny borigadin’ny zandary ihany ireto andian’olona “voabaikona mpanao politika” ireto saika mbola hanao ny fitsaram-bahoaka hatrany. Nandray fepetra noho ny zava-nisy anefa ireto zandary, ka raikitra indray ny sakoroka sy ny disadisa. Omaly hariva dia nangataka ny fanalana ireo zandary any an-toerana sy mitaky koa “fitsaram-bahoaka” ho azy ireo ireto andian’olona. Tantara mbola hitohy…