“Efa noravan’ny CES izao tetezamita izao”

21/05/2013

Latsaka ao anaty fahasahiranana tanteraka ny firenena taorian’ny fahotana mahafaty nataon’ny Fitsarana manokana momba ny fifidianana na ny CES, ka tokony handray ny andraikiny faran’izay haingana ny mpitsara manerana ny Nosy, hoy ny antso avo nataon’ny fikambanana Fikambanan’ny Bemiray Malagasy (FBM) izay nanao valan-dreseka ho an’ny mpanao gazety ny faran’ny herinandro teo. Kianin’ity fikambanana ity ary kilasiany ho fanetriben’ny firenena ny didim-pitsarana navoakan’ny Fitsarana manokana momba ny fifidianana izay namoaka ny anaran’ireo kandida mahazo mifaninana amin’ny fifidianana filoham-pirenena izay hatao eto Madagasikara amin’ny 24 jolay ho avy io. Ho azy ireo dia efa rava ho azy avy amin’iny didim-pitsarana navoakan’ny CES iny ny tetezamita tarihan-dRajoelina.

Mitodika manokana amin’ireo mpitsara manerana ny Nosy ny antso nataon’ireo mpikambana ao amin’ny fikambanan’ny Bemiray Malagasy na ny FBM nandritra ny valan-dresaka ho an’ny mpanao gazety izay nokarakarainy tamin’ny faran’ny herinandro teo. Araka ny nambaran’ity fikambanana ity dia manana andraikitra goavana amin’ny zava-misy eto amin’ny firenena amin’izao fotoana izao ny mpitsara tsy an-kanavaka satria izy ireo no angady nananana sy vy nahitana ny CES na ny Fitsarana manokana momba ny fifidianana. Ity farany izay tondroin’ny FBM ho fanetriben’ny firenena taorian’ny famoahany ilay didim-pitsarana milaza ny anaran’ireo kandidà mahazo mifaninana amin’ny fifidianana filoham-pirenena amin’ny 24 jolay ho avy io. Didim-pitsarana izay rangory fototry ny afo amin’ny fahasahiranana goavana misy eto amin’ny firenena izao. Nambaran’izy ireo ihany koa fa mandrava ny fitondrana tetezamita tarihan-dRajoelina amin’izao fotona izao iny didim-pitsarana iny. “Rava ho azy io tetezamita io satria minisitra maromaro amin’ireo mandrafitra ny governemanta no afak’asa noho ilay didim-pitsarana navoakan’ny CES tamin’ny 3 mai lasa teo. Torak’izany koa ny filohan’ny tetezamita izay afak’asa manomboka amin’ny 24 mai arak’iny didim-pitsarana iny ihany satria tsy maintsy mametram-pialàna ny tenany amin’io daty io. Sitra-pony no nilatsaka ho kandidà ary efa nankatoavin’ny CES izany. Tsy azo ekena anefa raha izy izay efa nametram-pialàna no handamina ny fandimbiasana ny toerany”, hoy ny fanazavan’ny filoha lefitry ny FBM, Ravelonjohany, nandritra izany valan-dresaka ho an’ny mpanao gazety izany.
Eo anatrehan’izany dia mitaky ny handraisana andraikitra amin’ny alalan’ny fanoloana ireo mpikambana ao amin’ny CES ny FBM. Nambarany fa tsy misy afa-tsy ny mpitsara manerana ny Nosy no afaka mandray izany andraikitra izany satria izy ireo no nametraka ity andrim-panjakana manokana hitsara ny raharaham-pifidianana eto Madagasikara ity. Miantso ny sendikan’ny mpitsara mba handray andraikitra ihany koa ny FBM.