Manohana ny fampihavanan’ny FFKM

21/05/2013

Nandritra ny fotoam-pivavahana iraisam-pinoana izay nokarakarainy ny asabotsy teo, tao amin’ny kianja maitson’Antsahamanitra no nanambaran’ny HMF (Hetsiky ny mpitondra fivavahana) fa mendrika ho tohanana homena fankaherezana ny FFKM manoloana ny fampihavanana izay imasoany amin’izao fotoana izao. Nambaran’izy ireo ihany koa fa mamela ireo nisetrasetra taminy ny HMF saingy tokony hibebaka aloha ary hiaky ny fahadisoany ireto farany. Ny hamerina ny maro ao anatin’ny fahamarinana no loha-hevitra nentin’ny HMF nanatontosa izany fotoam-bavaka tamin’ny faran’ny herinandro izany.

Nahatsiaro ny datin’ny 20 mai, tsingerin-taonan’ny hetsika nitranga teny amin’ny Mausolée Andrainarivo ka nisian’ny fifandonana teo amin’ny mpitandro filaminana avy ao amin’ny FIGN sy ny mpitandro filaminana avy amin’ny Emmo Rég eto Antananarivo, tamin’ny taona 2010 ny fikambanana HMF na ny Hetsiky ny mpitondra fivavahana. Hetsika moa izay tsiahivina ihany fa niafara tamin’ny fahafatesan’olona sy faharatrana ary fampidirana am-ponja ireo izay voakasik’izany hetsika izany. Fotoam-pivavahana iraisam-pinoana izay natao tao amin’ny kianjan’Antsahamanitra ny sabotsy teo no nentin’izy ireo nanamarika izany daty izany. Nandritraizany fotoam-pivavahana izany no nanambaran’ny mpitarika ny HMF fa mamela ireo izay nisetrasetra ka nampitondra faisana azy ireo ny mpikambana rehetra ao amin’ny HMF. Tokony hiaiky heloka kosa anefa, ary tokony hibebaka ireo izay nahavita izany heloka izany.
“Ny voany no hahafantarana ny hazo tsara”
Ankoatr’izay dia nasongadin’ireo izay nandray fitenenana nandritra ny fotoam-pivavahana iraisam-pinoana tamin’ny asabotsy teo tao Antsahamanitra fa manohana tanteraka ny fampihavanam-pirenena izay tarihan’ny FFKM amin’izao fotoana izao ny HMF. Nambaran’ny mpitarika ny HMF fa ilaina ny fanohanana sy ny fankaherezana ny FFKM manoloana ny adidy mavesatra izay noraisiny eto amin’ny tany sy ny fanjakana amin’ny fampihavanana ny vahoaka Malagasy.
Tsara ny manamarika fa noraisin’ny HMF ho lohahevitra izay novoaboasana nandritra ny fitoam-pivavahana ny hoe « hamerina ny maro ao anatin’ny fahamarinana ». Nambaran’izy ireo fa mila averina amin’ny fahamarinana ny maro : ny mpitondra, ny foloalindahy, ny kandidà hilatsaka ho fidina, ary ny fianankaviambe iraisam-pirenena. Mila averina amin’ny fahamarinana ny vahoaka, hoy ihany izy ireo mba handàla ny fihavanana maha Malagasy.
Manoloana ny firosoana amin’ny fifidianana filoham-pirenena dia nanamarika ihany koa ny mpitarika ny HMF fa tokony hahay hanavaka araka ny tokony ho izy ny tsara sy ny ratsy amin’ireo mpifaninana ny Malagasy mba tsy hiverenan’ny fahasahiranana mianjady amin’ny firenena amin’izao fotoana izao. Ny voany no ahafantarana ny hazo tsara na ratsy hoy hatrany ny fanazavan’ny HMF.