« Hisy loza eto amin’ny firenena raha tsy miala amin’ny fitondrana i Andry Rajoelina »

22/05/2013

Tonga eto Antananarivo indray i Kidimila, mpitan-kazomanga avy any amin’ny faritra Atsimo antsinanana, amin’izao fotoana izao, raha efa nandalo teto ny tenany tamin’ny taona 2012. Tamin’izay fotoana izay no nitondran’ity mpitana ny fomban-drazana ity ny fahitany ny fizotran’ny raharaham-pirenena, tamin’ny alalan’izay heveriny fa fanomezan-janahary ao aminy. Nambarany ary tamin’io fotoana nahatongavany teto tamin’ny taona 2012 io fa tsy ho tanteraka ny fifidianana kasaina hatao eto Madagasikara.

Amin’izao fotoana izao kosa dia ny mety hiafaran-dRajoelina indray no nambarany. Araka ny fanazavany dia efa daty neken’ny Zanahary tsy maintsy hialàn-dRajoelina eo amin’ny fitondrana ny faha 24 mai ho avy io. Noho izany dia tsy maintsy miala teo izy raha tena tia tanindrazana marina. Ny antony dia satria mety hisy loza maro hiseho eto amin’ny firenena raha mikiribiby tsy miala amin’ny fitondrana i Rajoelina amin’io daty io. Isan’izany ny ady saritaka eo amin’ny samy Malagasy izay hampisy rà mandriaka eto amin’ny firenena. Eo ihany koa ny mosary goavana hanjo ny Malagasy ary izao firongatry ny andiam-balala izay efa tsy voafehy amin’izao fotoana izao no fiandohan’izany. Ankoatr’izay dia isan’ny voalaza tao amin’ny faminanian’ity mpitan-kazomanga avy any Manambondro Vangaindrano ity ihany koa ny momba an-dRajoelina. Nambarany fa hisy loza hanjo azy sy ny fianankaviany raha sanatria ka tsy manaiky ny hiala eo amin’ny fitondrana ny tenany amin’ny datin’ny 24 mai ho avy io. Torak’izany koa ireo rehetra izay mbola manohy ny fandrobana ny harem-pirenena syizay manangon-karena am-pitaka, ary ireo nandatsaka ain’olona eto amin’ny firenena. Samy hahazo ny vokatry ny asa ratsy nataony isan’isany avy ireo ankolafin’olona ireo, araka ny fanamarihan’i Kidimila.
Mila miverina amin’ny fahendren-drazana isika
Ho an’i Kidimila dia dingana mety ahitam-bokany ampahany ihany amin’ny famerenana an’i Madagasikara amin’ny maha izy azy ny fampihavanana izay tarihan’ny FFKM. Saingy mbola tsy hamaha tanteraka ny teny votoatin’ny olana misy eto amin’ny firenena izany. Ny tena goavana indrindra, araka ny nambarany dia ny fiverenan’ny Malagasy amin’ny fehendrena nenti-mpaharazana izay nananany hatramin’izay. Miantso ny rehetra amin’izay fiverenana amin’ny fehendren-drazana izay ary ity mpaminany ara-pomban-drazana ity. Nambarany fa tokony hisy fanadiovana ara-pomban-drazana hatao amin’ny faritra samihafa eto amintsika mba hamerenana ny hasin’ny tanindrazana. Fara-tampony amin’izany ny fanadiovana tokony hatao ao amin’ny tany masina etsy Mahamasina izay tokony hifanaovan’ny foko Merina sy ny avy any anindran-tany.