20 tapitrisa ariary no lasan’ny jiolahy

22/05/2013

Mandravarava ny “bande de six”. Ny toeram-pivarotan-tsolika Jovena tao Volobe Ambolomadinika any Toamasina indray no lasibatra tamin’ny alatsinainy teo tokony ho tamin’ny enina ora hariva. Araka ny vaovao avy any an-toerana dia miisa enina izy ireo no tonga teo amin’io toerana io. Samy nitondra basy avokoa izy ireo ary tsy nisy nisaro-tava na iray aza.

Moto scooter miisa telo kosa no nitondra azy enina mirahalahy fantatra amin’ny hoe ‘bande de six”. Avy hatrany dia nandrahony ny mpitam-bola tao amin’ity fivarotan-tsolika ity tamin’ny alalan’ny poa-basy izy ireo raha vantany vao tafiditra tao amin’izany faritra izany. Tsy nisy azo natao arak’izany afa-tsy ny nanome azy ireo ny vola rehetra tao amin’ity fivarotan-tsolika ity. Voalaza fa vola mitentina 20 tapitrisa ariary no lasan’izy ireo tamin’izany. Marihina fa tsy nety nilaza ny habetsahan’ny vola lasan’ny mpangalatra ny tao amin’ilay toby fivarotan-tsolika. Ny angom-baovao kosa no nahafantarana an’izany.
Tanora avokoa
Tsara ny mampatsiahy fa tsy sambany no nanao fanafihana toy izao ireto atao hoe « bande de six » ireto. Fara fahakeliny dia efa nahatratra 5 ny fanafihana nataon’izy ireo raha ity volana mai ity no resahina. Araka ny loharanom-baovao avy any an-toerana dia izy ireo no nanafika ny Galana tao Barikadimy. Mbola izy ireo ihany koa no voalaza fa nanafika ny trano fonenan’ny CST, TGV, Naharimamy Irma, tao Ambohijafy. Torak’izany ny nanjo ilay mpivarotra vavy mipetra-drery tao amin’ny bazary Ankirihiry sy ny tranom-barotra “profilage” Ambalakisoa ary ny mpivarotra jirofo haka vola tao amin’ny orinasa Scim sy ilay tranom-barotra mpivarotra moto tao Tanambao V. Rahany fanazavana azo tamin’ny mpitandro filaminana dia tanora avokoa ny ao amin’ity “bande de six” ity satria eo anelanelan’ny 16 ka hatramin’ny 21 taona izy ireo. Niaiky kosa anefa ireo mpitandro ny filaminana fa sarotra ny fanarahana an’ireto andian-jiolahy ireto. Eo aloha ny taonany izay tanora loatra sy ny habeny izay somary kely vatana ary ny fiainany an-davanandro izay tsy misy fihavahany fa mitovy lalandava amin’ny fiainan’ny tanora ao Toamasina. Fantatra ihany koa fa tsy manao “mission” alina izy ireo fa ny atoandro ary tsy matahotra ny mampiasa ny basy “kalaky” sy “PA” eny aminy raha misy sakana amin’ny “operation” ataony.