Ahiana ny hisian’ny valan’aretina

23/05/2013

Efa nanomboka hatramin’ny volana oktobra no nitrangan’ity olana amin’ny resaka fako eny Andraisoro ity. Mitaraina noho izany ireo mponina satria dia efa mitady hiditra hatreny an-tokonam-baravarana ny fako, ny fofofona amin’izany tsy lazaina intsony. « Ny volana oktobra ka hatramin’ny janoary dia nalaina isam-bolana ny fako tety aminay. Ny fiaraben’n y kaominina no manatanteraka izany. Taty aoriana anefa dia zara raha nisy izany ka ny fanazavana nentin’ny avy ao amin’ny kaominina dia ny hoe tery loatra ny làlana ka tsy afaka mankany ny fiarabe mpitatitra fako », hoy ny fanazavan-dRafaratahiana Narindra, renim-pianakaviana monina ao Andraisoro manakaiky ny fanariam-pako. « Tena tsy zaka ny fofona rehefa misandratra ny masoandro. Ary indrindra efa mila hiditra aty an-tokotaninay mihitsy izany raha mitohy kely. Ny sefom-pokotany moa dia efa manao izay hafany mahakasika ny olana fa hatramin’izao tsy mbola nahitana vahaolana », nanindry mafy ramatoa Narindra. « Ahiana ny hisin’ny valan’aretina noho ny loto sy ny voalavo », hoy hatrany Narindra, amin-kahatezerana.

Aiza ny kaominina ?
Tsy mbola nandrenesana valin-teny na resaka mandeha hatramin’izao ny mikasika ny fanesorana ny fako izay efa mila hitovy halavana amin’ny tamboho etsy Andraisoro. ”Tsy tonga ny kamiaon’ ny kaominina ny toerana fanariam-pako koa izahay mponina izany no mila mamaha ny olana. Manontany tena ny vahoaka hoe aiza ny tompon’andraikitra amin’izao. Mbola mampisalasala ihany koa hoe olona hilatsaka ho filohan’ny repoblika ve ny PDS Edgard Razafindravaha nefa Antananarivo aza tsy voafehiny ? Mampanahy ihany ny hoavin’ny firenena raha toa ka toy izao hatrany no ataon’ireo mpitondra”, hoy Ramino Alphred, zokiolona toa -teny eo an-tanàna. “Ny mampanahy amin’izao dia efa mihitatra makany amin’ny fasana ny fako ka ahiana hirongatra ny aretina vokatr’izany loto izany. Napetraka ny “Dina” ho an’ireo izay tratra manary fako eo amin’ny fasana, nefa tsy nahasakana ireo olona hanary fako eo ihany izany”, hoy hatrany Alphred maneho ny heviny, manahy sady kivy.
700 Ar isa-trano
Tamin’ny volana mars lasa teo dia nisy ny fitakiana vola 700 ar isa-tokan-trano, mba hanofana fiara hitatitra ireo fako ireo. Nisy roa izy ireo ary indray mandeha ihany no nahitana izany. Araka ny hoe maha kely ny fiara dia tsy naharoaka firy akory fa zara raha nisy niala ny fako. Ny nampalahelo dia tsy nisy nanetsika intsony ity resaka fako ity fa dia samy manao izay saim-patany ny tsirairay. ”Ny anentanana ny mponina amin’izao fotoana izao dia mba samy hanao lava-pako isan-trano, fa ny mampalahelo dia ho aiza izany ireo izay tsy mba manana tokontany malalaka na toerana hasiana izany? Sarotra tanterahana aminay aloha ny hanorenana lava-pako eo an-tokontany satria zara raha aza raha misy toerana hasiana tongotra”, hoy Ranjatiana Emma renim-pianakaviana hiaran’ny fijaliana amin’ny fanariam-pako.