Nisy namaky ny Fitsarana

23/05/2013

Ny solosaina roa tao amin’ny birao mirakitra ny “registre de commerce” sy ny solosaina tao amin’ny birao fiasan’ireo “substituts” no lasan’ny mpamaky trano tao amin’ny Fitsarana ambaratonga voalohany tany Toamasina. Tombanana ho tamin’ny alatsinainin’ny pentekoty no nisian’izany famakian’olo-tsy fantatra ireo birao irreo izany. Hatreto dia heverin’ny tomponandrikitra fa mety ho asan-jiolahy tsotra ity nitranga ity. Voafonja rahateo ny niambina ny Fitsarana tamin’io fotoana io.

Lasibarty ny vaky trano hatramin’ny fitsarana ambaratonga voalohany. Ny zava-nitranga tany Toamasina no manamarina izany. Araka ny vaovao dia nisy namaky ny biraon’ny fitsarana ambaratonga voalohany tany an-toerana. Raha ny fanazavan’ny lehiben’ny fampanoavana ao amin’ity Fitsarana ity dia mety ho tamin’ny alatsinain’ny pantekoty no nitrangan’ity vaky trano ity satria tsy mbola nisy tatitra momba izany nataon’ireo mpiambina ny alahady. Very nandritra izany vaky trano izany ny solosaina roa mirakitra ny “registres des commerces” tao ambany rihana. Novakian’ireo andian’olona ireo ihany koa ny birao roa iasan’ireo “substituts” tao ambony rihana ka lasa tamin’izany ihany koa ny solosaina fiasan’izy ireo amin’ny fanadiadiana ataony. Tamin’ireto farany aloha dia tsy nisy ny antontan-taratasy very noho ny tahirin’ny fampanovana tsy ao anatin’ny solosaina fa tsy maintsy atao antontan-taratasy voarakitra eo anivon’ny mpiraki-draharaha. Tsy vakin’ireo jiolahy kosa ny birao misy ny mpiraki-draharaha sy ny biraon’ny lehiben’ny fampanovana.

Asan-jiolahy?

Marihina fa tsy nisy mpiambina nandritra io vaky trano io. Nambaran’ny lehiben’ny fampanohavana fa izay no nanamora ny asa ratsin’ireo mpamaky trano. Tsara ihany koa ny manamarika fa voafonja heverina hahavita ny asa ary tsy manana antontan-taratasy ratsy eo anivon’ny fitsarana no mpiambina ny biraon’ny fitsarana ireo.
“Raha ny zava-nitranga dia asan-jiolahy tsotra ihany no nisy, nefa ny fanadiadiana efa mandeha no tena hamaritra izany. Ireo mpiambina voafonja nampiasain’ny fitsarana tokony nisahana ny fiambenana tsy nanao ny asany kosa dia efa naverina eny amin’ny fonjan’Ambalatavoahangy avokoa ary nanaovana fanadiadiana mba tena hahalalana ny marina”, izay no fanamarihana nataon’ny lehiben’ny fampanoavana manoloana ity raharaha ity.
Tsara ihany koa manamarika fa tsy sambany no nisy fikasana hamaky ny fitsarana tany Toamasina. Nanomboka ny faran’ny taona 2012 ka hatramin’izao dia efa in-03 nisy namaky ity fitsarana any Toamasina ity. Teo ny fitsarana amin’ny ady atao amin’ny fanjakana sy ny resaka ara-pitantanam-bolam-panjakana, ny lehiben’ny mpiraki-draharaha sivily ary ity nitranga farany teo anivon’ny mpiraki-draharaha ara-barotra sy ny “substituts” ny fampanoavana ity.