Mirongatra ny fitrandrahana vatosoa tsy ara-dàlana

07/11/2012

Manao ranolava indray amin’izao fotoana izao ny fahatongavan’ireo mpividy sy mpitrandraka vatosoa, vahiny sy teratany Malagasy any amin’iny distrikan’i Mampikony iny. Faritra maro ao anatin’izany distrika izany amin’izao fotoana izao no ahitana toeram-pitrandrahana vatosoa sy volamena. Tsy manana taratasy ahafahany manao izany fitrandrahana izany anefa ny ankamaroan’ireo mpitrandraka. Manjaka arak’izany ny gaboraraka. Etsy an-danin’izany, velon-taraina ihany koa ny ankamaroan’ny mponina nohon’ny fiakaran’ny vidim-piainana sy ny fanararaotana amin’ny endriny maro ataon’ireo vahiny.

Toy ireo faritra maro izay nahitana vatosoa dia ifanotofan’ny maro ihany koa amin’izao fotoana izao ny fitrandrahana misy any amin’ny distrikan’i Mampikony ao amin’ny Faritra Sofia. Maro dia maro arak’izany ireo mirohotra mankany amin’ity toerana ity, na vahiny izany, na teratany Malagasy. Raha araka ny fanazavan’ny CT Bendaza Eloi, izay avy any amin’iny faritra iny dia gaboraraka tanteraka ny ankamaroan’izany fitrandrahana vatosoa any amin’ny distrikan’i Mampikony izany, raha tsy hiteny afa-tsy ny tsy fananan’ny ankamaroan’ireo mpitrandraka sy mpandraharaha ny taratasy ahafahan’izy ireo manao izany asa izany. Manampy trotraka ihany koa, araka ny filazan’ity parlemantera ity ihany, ny tsy fisian’ny fanaraha-maso entitra avy amin’ny fitondram-panjakana ny momba ireo mpitrandraka ireo. Vokatr’izany dia lasa toerana fakan-karena fotsiny ihany ny distrikan’i Mampikony ho an’ireo mpandraharaha vahiny ireo. Tsy misy hatramin’izao ny fandraisan’anjaran’izy ireo amin’ny fampiroboroboana ny sosialin’ny vahoaka any amin’iny faritra iny toy ny fanampiana amin’ny fanamboaran-dàlana na ny fananganana fotodrafitrasa toy ny sekoly sy ny toeram-pitsaboana. Ankoatr’izay dia tsy hita taratra ihany koa izay mba tamberimbidy homen’ireo mpandraharaha maro dia maro ireo ho an’ny Faritra Sofia na ho an’ny distrikan’i Mampikony, avy amin’izany fitrandrahana vatosoa izany.
Lasa tompony mangataka atiny arak’izany ireo mponina any amin’iny distrika iny manoloana ny firongatry ny fitrandrahana tsy ara-dalana ny vatosoa ao aminy.
Fantatra ihany koa, araka ny loharanom-baovao ihany fa miteraka fasahiranana maro ho an’ny ray aman-dreny sy ny fianankaviana ao amin’izany tanana izany ny fisian’ireo teratany vahiny tonga maro any an-toerana. Isan’ny olana lehibe amin’izany ny fiakatry ny vidim-piainana. Eo ihany koa anefa ny forongatry ny fanararaotana ireo ankizy tsy ampy taona izay voasarik’ireo vahiny nohon’ny tsy fananana, sy ny firongatry ny tsy fandriam-pahalemana amin’ny endriny samihafa.
Manaitra ny sain’ny fitondram-panjakana arak’izany ity parlemantera ity mba hisian’ny fandraisan’andraikitra amin’ny fampanarahan-dalana toy izay natao tany amin’ny faritra hafa, ary mba ahatonga ny haren’izany distrika izany ho amin’ny tombontsoan’ny mponina any an-toerana.