Hanokafana fanadihadiana

25/05/2013

Nanao fanambarana miantefa amin’ireo masoivoho vahiny miasa sy monina eto Madagasikara, omaly, ny minisitry ny Raharaham-bahiny Malagasy Pierrot Rajaonarivelo sy ny minisitry ny Fitsarana Christine Razanamahasoa, ny minisitry ny Fiarovam-pirenena ary ny minisitry ny Filaminana anatiny. Fialàn-tsiny manoloana ny zava-nitranga tamin’ilay hetsika niainga tao Tsaramasay tamin’ny Alarobia teo sy fanomezan-toky an’ireo masoivoho vahiny no votoatin’izany fanambarana izany. Voalaza ihany koa fa hanokatra fanadihadiana manodidina iny hetsika iny ny governemanta.

Hetsika azo enjehina amin’ny làlana manan-kery eto amin’ny tany sy ny fanjakana iny nitranga tamin’ny alarobia teo iny, araka ny fanazavan’ny minisitry ny Fitsarana, Christine Razanamahasoa nandritra ny resaka nifanaovany tamin’ny mpanao gazety omaly taorian’ny fihaonan’izy ireo tamin’ireo masoivoho vahiny miasa sy monina eto amintsika. Fihaonana izay nitondran’ny Governemanta, tamin’ny alalan’ny ministeran’ny Raharahambahiny sy ny ministeran’ny Fitsarana, ny ministeran’ny Fiarovam-pirenena ary ny ministeran’ny Filaminana anatiny, ny fialàn-tsiny tamin’ireo solon-tenam-panjakana eto amintsika manoloana ilay hetsika fanaratsiana vahiny nitranga tamin’ny alarobia lasa teo teto Antananarivo. Voalaza mazava tao anatin’ilay fanambarana natao tamin’io fotoana io ihany koa fa hanokatra fanadihadiana mikasika iny zava-nitranga iny ny governemanta. Efa nambaran’ny Praiminisitra rahateo moa izany tamin’ny fanambarana nataony.
Tsara ny mampatsiahy fa nandeha tamin’ireo haino aman-jery samihafa teto an-drenivohitra ny fanentanana ny olona handray anjara tamin’izany hetsika izany. Hita teny an-toerana nandritra ny hetsika ihany koa ny tompon’andraikitra iray avy ao amin’ny fiadidiana ny tetezamita. Tsy isalasalana arak’izany ny milaza fa tsy ho sarotra ho an’ny mpanao fanadihadiana ny mikaroka izany tena ati-doha nikotrika ireny fihetsika ireny. Hetsika izay nomarihan’ny fanambarana novakian’ny minisitry ny Raharaham-bahiny mazava tsara fa natao hanakorontanana ny firenena tsotra izao.
Nomena toky ireo vahiny
Nandritra ity fihaonana omaly ity dia nanome toky ireo masoivoho vahiny ny governemanta Malagasy fa hanamafy ny fandriam-pahalemana, indrindra ny fiarovana ireo solontenam-panjakana vahiny eto amintsika. Nilaza mazava ihany koa ireo mpitandro filaminana fa efa misy mihintsy ny fepetra manokana noraisina hiarovana ny trano fonenana sy ny fianankavian’ireo masoivoho ireo.