Niverina ny delestazy

25/05/2013

Ahiana mafy ny hitrangan’ny toe-draharaha toy ny tany Mananara avaratra raha ny zava-misy any Toamasina amin’izao fotoana izao no resahina. Nanomboka ny alakamisy tamin’ny 08ora alina dia miaina ao anatin’ny haizina tanteraka ny ampahany maro ao amin’izany renivohitra ara-toe-karenan’i Madagasikara izany.

Ny loharanom-baovao no nilaza fa nanome baiko ny hampijanona ny famatsiany herin’aratra ho an’ny orinasa Jirama, nanomboka tamin’ny alakamisy teo ny tale jeneralin’ny Enelec. Mbola ny loharanom-baovao ihany no manazava fa mahatratra am-polony miliara ariary ny trosa tsy nalohan’ny orinasa Jirama tamin’ny Enelec, kanefa tsy misy mihintsy ny hetsika na kely aza amin’ny fandoavana ny ampahany amin’io trosa io. Tsy nahafaly azy ny Enelec ihany koa ny fisian’ny baiko midina tsy misy farany izay miantefa amin’ity orinasa ity ny amin’ny tsy maintsy hamokarany herinaratra ho an’ny Jirama sy ny amin’ny tsy maintsy hanajany ny bokin’andraikitra nosoniaviny.

Mananara avaratra bis

Manoloana izany dia rè fa tsy hamerina ny famatsiany jiro ny Jirama intsony ny “Enelec” raha tsy misy ezaka amin’ny fandoavana ny trosa ny tale jeneralin’ny Jirama sy ny fanjakana. Ao anatin’ny fahasiranana ara-bola tanteraka ihany koa ny “Enelec” ankehitriny noho ireo vola mivoaka betsaka amin’ny asa maro natao nanavaozana ny fitaovana sy ny famatsiana solika ny toby ary ny fandoavana ny karaman’ny mpiasa, nefa ny vola miditra tsy misy.

Tsy misy afa-tsy 09MW, arak’izany ny habetsahan’aratra homen’ny Jiirama ny mpanjifa any Toamasina nanomboka ny alakamisy alina, raha mahatratra 18 – 21MW ny filàna isan’andro ao amin’izany tanana izany. Miandry ny famahana ity olana ity ny vahoakan’i Toamasina satria mirongatra izay tsy izy ny tsy filaminana ary efa faritra “mena” avokoa ny an-kamaroan’ny tanana samihafa ao aminy amin’izao fotoana izao. Eo ihany koa ny fiatrehan’ny mpianatra ny fanadinam-panjakana samihafa ary ny filàn’ny orinasa samihafa sy ireo toeram-piasana any an-toerana. Manahy ny amin’ny mety hahatonga an’i Toamasina ho “Mananara avaratra Bis” ny mponina amin’izao fotoana izao.