Tsy nahasarik’olona ny tany Toamasina

27/05/2013

Nisy saingy tsy nahasarik’olona ny vavaka fifadian-kanina izay nampifanandrifiana tamin’ny hetsika nokarakaran’ny fiadidiana ny tetezamita tamin’ny sabotsy teo tany Toamasina. Ireo mpitondra izay notendren’ny fitondrana tetezamita tany amin’iny faritra iny no voalohany tamin’ireo tsy tonga nanatrika izany vavaka izany, izay natao tao amin’ny lapan’ny tananana tany an-toerana. Tsy tazana tao ny filohan’ny delegasionina manokan’ny kaominin’i Toamasina Toalina Zafindrabary. Tsy tonga ihany koa, na ny lehiben’ny faritra atsinanana Mahavimbina Alain, na ny lehiben’ny distrika ary ireo talem-paritra samy hafa. Ny hany nanohina ny antso ka tonga nanome voninahitra ny fotoana dia i Naharimamy Irma Lucien sy ny talem-paritry ny fahasalamam-bahoaka any amin’ny Faritra Atsinanana ary Atoa Ricky Dinh-Van Pagni.

“Fahombiazana amiko ny zava-nisy tamin’ny finiavan’ny vahoaka Malagasy miombom-bavaka sy nifady hanina noho ny fanavotam-pirenena sy ny fametrahana ny fiandrianam-pirenena izao. Mety vitsy no tonga fa ny hita aloha dia olona tena vonona ny hivavaka sy hibebaka ho an’ny fireneny no hita, ka mamaly vavaka Andriamanitra ho an’ny firenentsika”, izay no nambaran’i Naharimamy Irma Lucien nandritra ny fandraisam-pitenenany. Ho an’ny hafa izay naneho ny heviny kosa dia nambaran’izy ireo fa “tsy tokony hijerena tavan’olona, na ireo mpanomana sy namolavola ny hevitra ny vavaka ho an’ny firenena tahaka izao, satria antsika Malagasy i Madagasikara ka isika no tokony ho loha-laharana amin’ny fanavotana azy”.
Naharitra adiny iray sy sasany teo ny vavaka natao izay nanomboka tamin’ny 03ora tolakandro. tazana tamin’ireo mpitarika ny fotoam-bavaka ihany koa fa ny Anglikana ihany no vondrom-pinoana avy amin’ny FFKM namaly ny antso. Ireo pasiteran’ny fiangonana zandriny sy ireo antokom-pihira ny fiangonana Fjkm Betela Tanambao V no nifanampy nanao ny toro-teny sy ny fanentanana ary fandrindrana ara-letorijia rehetra nandritra ny vavaka natao.