Hametra-pialàna androany

27/05/2013

Tapitra amin’ity androany ity, amin’ny efatra ora tolakandro, ny fe-potoana iandrasan’ny Fitsarana manokana momba ny fifidianana ny fametram-pialàn’ireo kandidà mitana andraikitra ao anatin’izao tetezamita izao. Andrasana amin’ity androany ity arak’izany ny fametram-pialàn’i Rajoelina amin’ny maha filohan’ny tetezamita azy sy ny an’i Dolin Rasolosoa amin’ny maha filohan’ny Filankevitra avon’ny tetezamita azy. Andrasana aorian’izay kosa ny hisolo azy ireo amin’izany andraikitra izany.

Filohan’ny tetezamita vaovao no hitondra ny tany sy ny fanjakana manomboka androany tolakandro, raha voatazona araka ny fanambarana efa nataon’ny CENI-T tamin’ny faran’ny herinandro teo, sy ny fanambarana nataon’ny CES ary ny valin-dresaka nataon-dRajoelina tamin’ny zoma lasa teo no jerena. Ho an’ny CENI-T dia mitombina hatrany ny datim-pifidianana amin’ny 24 jolay ary tsy misy fiovana avokoa ny fanatanterahana ireo asa rehetra manandrify ny firosoana amin’ny fifidianana filoham-pirenena eto Madagasikara. Torak’izany ihany koa ny voalazan’ny CES tamin’ny fanambarana nataony tamin’ny zoma teo izay nampatsiahy ireo kandidà mbola mitana andraikitra amin’izao tetezamita izao fa androany alatsinainy amin’ny 4 ora tolakandro no fara-fandraisany ny fametram-pialàn’izy ireo. Ankoatr’izay dia niarahan’ny rehetra nandre ny nambaran’ny filohan’ny tetezamita izay nanamafy fa tsy hanala ny filatsahan-ko fidiny ny tenany raha tsy manala ny azy ireo kandidà izay angatahan’ny fianankaviambe iraisam-pirenena ny fisintonany ny filatsahan-kofidiny. Hatreto anefa dia mazava ny resaka fa tsy hiala amin’ny maha kandidà azy na i Ratsiraka Didier, na Lalao Ravalomanana. Raha ireo rehetra ireo arak’izany no atao indray mijery dia tsy isalasalana ny milaza fa amin’ity androany ity no hametraka ny taratasy fialàny amin’ny maha filohan’ny tetezamita azy eny amin’ny CES i Rajoelina. Andrasana torak’izany ihany koa ny fanendrena ny rafitra na olona hitondra ny tany sy ny fanjakana manomboka eto.
Mpitondra vaovao
Tsara ny mampatsiahy fa raha araka ny fanazavana ny làlana mahakasika ny fitantanana ny tetezamita aorian’ny fametraham-pialàn’ny filohany dia ny lehiben’ny Governemanta miaraka amin’ny filohan’ny CST ary ny filohan’ny CT no miara-mitantana ny tany sy ny fanjakana. Mbola tranga mety hiseho ary be mpiresaka ihany koa anefa ny amin’ny mety hakan’ny miaramila ny fitondrana na koa ny handraisan’ny mpitarika ny FFM miaraka amin’ny miaramila sy ny CSC ny fitondrana. Ireto farany izay nangataka ny hanemorana ny fifidianana tamin’ny faran’ny herinandro teo rehefa tsy nahomby ny famoriany ireo kandidà telo izay kianin’ny fianankaviambe iraisam-pirenena.
Marihina fa hatramin’izao ora anoratana izao dia miisa efatra ireo kandidà mitana andraikitra amin’ny tetezamita no efa nametram-pialàna tamin’izany andraikiny izany. Tsy iza ireo fa ny Praiminisitra lefitra Pierrot Rajaonarivelo, ny CST Faharo Ratsimbalson, ny CST Rasamoelina Brigitte, ary ny CST Rabetsaroana Sylvain. Mbola tantara mitohy kosa ny fifanilanana ao anivon’ny CST mikasika ny fametram-pialàn’ny filohany Dolin Rasolosoa izay takin’ny mpikambana sasantsasany ao amin’izany andrim-panjakana izany ny fifidianana izay handimby toerana azy. Hatreto dia mihevi-tena ho mbola tsy nametram-pialàna amin’ny maha filohan’ny CST azy ity mpanao politika ity. Marihina fa araka ny loharanom-baovao avy ao an’ivon’ity andrim-panjakana ity dia androany no hiroso amin’ny fifidianana izay ho filohan’ny CST handimby ny jeneraly Dolin Rasolosoa ny mpikambana ao amin’ny CST. Arak’izany dia ho filoha vaovao ihany koa ny hitantana ny Filan-kevitra avon’ny tetezamita manomboka rahampitso.