Voasambotra ny dimy tamin’ireo « bande de six »

30/05/2013

Nifarana hatreo ny maha « bande de six » an’ilay andian-jiolahy nalaza tamin’ny fandrobana sy ny fanafihana toeram-pivarotana tao Toamasina, herinandro vitsivitsy lasa izay. Voasambotry ny mpitandro filaminana avy ao amin’ny Polisim-pirenena any an-toerana ary efa nampidirina am-ponja ny dimy tamin’izy ireo. Mbola karohina kosa ny namany. Nandritra ny fivarotan’ny ireo tamin’izy ireo ny moto halatra no nahatratrarana ity farany fa nahatratrarana ny ambiny taorian’ny fanadihadiana.

Eo am-pela-tanan’ny mpitandro filaminana avy amin’ny Polisim-pirenena, amin’izao fotoana izao, ny dimy amin’ireo jiolahy nikoizan’ny mponina ao Toamasina ary nalaza ratsy tamin’ny anarana hoe “bande de six”. Tsy iza ireo voasambotra ireo fa i Alexandre, Fabien na Faby, Theo, Nicolas ary Tida.
Ny fitarainana voarain’ny mpitandro filaminana tamin’ny 25 may, taorian’ny fanafihana nataona andian-jiolahy ny tranona fianakaviana iray monina ao Tanambao V, ka nahavery ny Moto RN sy firavaka volamena ary vola Ar.300.000, no niantombohan’ny fanadihadiana rehetra, raha araka fanazavana nomen’ny kaomisera prinsipaly Ramilison Celestin tompon’andraikitry ny polisy misahana ny heloka be vava ao Toamasina. Ny fampitam-baovao avy amin’olo-tsotra, hoy izy, no nahafantarana fa misy olona mivarotra Moto RN tao Andranomadio. Sarona tamin’ny alalan’ny fanaraha-maso natao, hoy ihany ity manamboninahitra ity, ny iray tamin’ireo jiolahy ireo ka izy avokoa avy eo no nahafahana nisambotra ny namany. Nandritra ny fisavana ny tranon’izy ireo kosa no nahatrarana moto Jog 02 sy fahitalavitra LCD 01, samy halatra avokoa.
Nandritra ny fanadiadian’ny nataon’ny polisy no nivoahan’ny marina rehetra tamin’ny fanazavana nataon’i Alexandre. Nambarany fa izy ireo avokoa no nanao ny fanafihana ny toerampivarotana moto Jieda Tanambao V, ny fanafihana ny tobin-tsolika Galana Barikadimy sy ilay tera-tany frantsay teny amin’ny Hopitaly be, ary ireo fanafihana tao Tanamakoa sy Ambalamanasy ary Ambohijafy. Saingy nomarihan’i Alexandre fa any amin’ireo namany telolahy mbola karohana avokoa ny basy PA maromaro (06 fara-fahakeliny) sy ny basy “fusil à pompe” iray efa novàna endrika.

Mpiray tsikombakomba

Ny angom-baovao ihany koa nahalalana, fa ireto andian-jiolahy tratra ireto dia ireo ekipa mpanao ny “mission” vaky trano fotsiny. I Alexandre sy ny iray amin’ireo telolahy mbola karohana kosa no mpanampy azy ireo hamenoana ny isa ho 06 hatrany, ary ity Alexandre ity koa no sady mpanampy azy 03 lahy karohana, no mpaka vaovao ny toerana “hiasana” tahaka ilay tranga tao amin’ny Galana Barikadimy. Ankoatr’izay, dia fantatra ihany koa fa misy amin’ireo “chef carreaux” eny amin’ny fokontany ao Toamasina no mpiray tendro amin’ireo fikambanan-jiolahy ireo. Ny iray tamin’izy dimilahy ireo dia mifanila vodirindrina amina “chef carreaux” ary fantany tsara nefa tsy nisy ny filazana na fitarainana nataony tamin’ny mpitandro ny filaminanana. Izay antony izay no nahatonga ny kaomisera Ramilison Celestin ho hentitra ho amin’ireo “mpiray tsikombakomba”.