Tsy azo vangiana mihoatra ny 15 minitra isan-kerinandro

30/05/2013

Tsy marina ny filazana fa voahaja ny fifanarahana voarakitra ao amin’ny tondrozotra. Ny mifanohitra amin’izany no zava-misy, araka ny fanambaran’ireo fianankavian’ireo voafonja noho ny savorovoro politika nisy teto amin’ny firenena. Mbola misy 24 ireo gadra politika any am-ponja amin’izao fotoana izao ary any Tsiafahy ny ankamaroan’izy ireo amin’izao fotoana izao. Arak’izany dia mitaky ny fampiharana ny andininy faha 16 ao amin’ny tondrozotra ny fianankavian’izy ireo

Araka ny fanambarana voaray avy amin’ireo fianakavian’ny gadra politika dia tsy voahaja tanteraka ny zon’olombelona amin’ny fihazonana tsy ara-dàlana ny havan’izy ireo any am-ponja. Santionany mbola manamafy izany ny tsy famelana azy ireo mitsidika ny havany any am-ponja afa-tsy 15 minitra isan-kerinandro farafahabeny. Ny fanambaran’izy ireo ihany koa no nahafantarana fa mbola mahatratra 24 amin’izao fotoana izao ireo gadra politika mbola tsy nahazo fahafahana na dia voalaza ao amin’ny Tondrozotra izay efa lasa làlana eto amin’ny firenena aza ny tsy maintsy hanafahana azy ireo. Antony ilazana fa tsy ara-dàlana intsony ny mbola fihazonana azy ireo any am-ponja. Marihina fa saika any Tsiafahy avokoa ny ankamaroan’ireo gadra politika ka isan’izany ny jeneraly Raoelina ny jeneraly Fikisy ary ny Kolonely Jadifara sy ireo maro hafa.

Antso avo

Arak’izany dia manao fitarainana sy antso avo amin’ireo tompon’andraikim-panjakana amin’izao tetezamita izao sy amin’ireo mpanao Sonia ny tondrozotra ary amin’ny Fianankaviambe iraisam-pirenena, indrindra ny SADC, ireo vady aman-janakin’ny gadra politika mba hijerena akaiky ny momba azy ireo. Nomarihan’izy ireo fa tamin’ny fandalovan’ny solontenan’ny SADC teto an-toerana dia nilaza ny mpitarika ireto farany fa efa voahaja antsakany sy an-davany ny tondrozotra. Tsy izay anefa no tena zava-misy fa hodiana tsy hita tanteraka ny momba ny gadra politika. Iniana tsy resahana ihany koa ny andininy faha-16 ao amin’ny tondrozotra izay mamaritra ny famoahana ny gadra politika tsy misy hatakandro izany. Marihina fa araka ny fahitan’izy ireo dia tokony hivoaka alohan’ny fifidianana ireo miaramila sy sivily mbola migadra ara-politika ireo.