Nihaona ny Pr Zafy, ny Jly Ramihone ary ny Jly Bruno

08/11/2012

Manao ranolava amin’izao fotoana izao ireo fihaonana etsy sy eroa amin’ireo izay mahatsiaro tena fa manana andraikitra amin’ny fitadiavam-vahaolana manoloana izao fahavoazana tsy hita noanoa nitondran’ny Tetezamita ny firenena izao. Isan’ny nanaitra ny maro tamin’ireny fihaonana ireny ny fihaonana izay nandraisan’ny manamboninahitra anjara, toy izay nitranga teny amin’ny trano fonenan’ny filoha teo aloha Albert Zafy. Fihaonana izay ahafahana milaza fa efa manomboka sahy miseho sehatra tsikelikely ireo miaramila tsy mankasitraka intsony izao fitondrana tetezamita izao.

Tsy vitsy ireo milaza fa ireo miaramila sisa no tena mihazona izao fitondrana izao amin’ny toerana misy azy. Hatreto anefa dia mijanona ho hevitra sy fijery fotsiny izany satria sarotra ny hanamarina azy. Tsy isalasalana anefa ny milaza fa izany fomba fijery izany anefa no isan’ny antony mahatonga ny maro hampifandray ny fivoaran’ny raharaham-pirenena eto amintsika amin’izay fihetsiky ny miaramila, indrindra ireo manamboninahitra. Tsy mahagaga ary, arak’izany, raha nisarika ny sain’ny mpanara-baovao ny fisian’ny fihaonana teo amin’ny Profesora Zafy Albert sy ny Jeneraly Razafindrakoto Bruno ary ny Jeneraly Amédée Andriamisa Ramihone. Fihaonana izay voalaza fa tafiditra ao anatin’ny fikatsaham-bahaolana amin’izao krizy misy eto amin’ny firenena izao. Fantatra ihany koa, tsetsy an-danin’izany fa nisy fihaonana nataona manamboninahitra maromaro taorian’io fihaonana tao amin’ny trano fonenan’ny Profesora Zafy Albert io. Teny Tsaralalana no toerana nanaovana ity fihaonana teo amin’ireo manamboninahitra maromaro ireo.
Tsiahivina fa nadritra ny fahatongavan’ireo iraka miaramila nalefan’ny SADC hanao fanadihadiana mikasika ny fiarovana ny filoha teo aloha Ravalomanana Marc amin’ny fampodina azy eto an-tanindrazana, dia nisy ihanhy koa manamboninahitra ambony sy manamboninahitra kefitra ary miaramila maromaro izay nihaona tamin’ireo vahiny ireo. Fihaonana izay nahafahan’ireto farany nilaza mazava ny tsy fankasitrahan’izy ireo ny fihetsiky ny manamboninahitra sasantsasany amin’ny fanohanana an-jambany an’izao tetezamita izao. Fihetsika izay nambaran’izy ireo fa mivaona amin’ny sata maha miaramila, ary indrindra mampiditra an-davaka ny firenena. Tsara ny mampatsiahy fa tamin’ny alalan’ny fanampian’ny ampahany tamin’ny miaramila no nahafahan’ny fitondrana amin’izao fotoana izao nandrodana ny fitondrana teo aloha.
Azo lazaina ary, arak’izany rehetra izany, fa manomboka tonga saina amin’ny fahavoazana tsy roa aman-tany mahazo ny firenena ny ampahany amin’ny miaramila amin’izao fotoana izao. Porofo ihany koa izany fa tsy ny miaramila rehetra akory no miara-dalana amin’izao fitondrana izao. Na izany na tsy izany, tokony tsy adino ihany koa fa tsy vitsy amin’ireo miaramila no mora mivadika rehefa mahatsapa izy ireo fa voatoitoina ny tombon-tsoany.