Nitokona ireo mpitondra posy

31/05/2013

Naneho ny tsy faneken’izy ireo ny fomba fiasan’ireo polisy minisipaly any Toamasina ireo mpitondra posy any an-toerana omaly. Vantany vao nanomboka anefa ny hetsika dia noravan’ny mpitandro filaminana avy ao amin’ny polisim-pirenena noho ny fanahiana ny amin’ny mety hampitatra izany tahaka ny nitranga tamin’ny taona 2010. Nambaran’ny mpitarika posy fa mizaka ny tsy eran’ny aina izy ireo noho ny fitakiana vola tsy ara-drariny ataon’ny polisy monisipaly.

Nidina an-dàlambe ary nitokona teo amin’ny manoloana ny lapan’ny tanana tany Toamasina ireo mpitondra posy tany an-toerana, omaly tolakandro. Hetsika izay azo lazaina fa tsy naharitra ela satria raha vao nanomboka izany dia nirotsaka an-tsehatra nanaparitaka azy ireo ny mpitandro filaminana avy amin’ny FIP Toamasina. Araka ny re dia nanahy mafy ny amin’ny mety hisian’ny fandrobana sy ny fihoaram-pefy vokatr’izany hetsika izany ireo mpitandro filaminana ka izay no nahatonga azy ireo nandrava avy hatrany ny hetsika. Araka ny loharanom-baovao kosa dia ny hatezeran’ireo mpitondra posy manoloana ny voalazan’izy ireo fa tsy rariny ataon’ny polisy monisipaly mandritra ny fisavana ny fazoan-dàlana ananan’izy ireo no nahatonga ny olana izao. Maro noho izany ny posy nolazaina fa “tsy ara-dalana” ka voagejy ny posiny ary nohafahana avy hatrany ireo nahaloa ny “ekolazy”, ka izay no niteraka ny “sakoroka” ary izao tonga tamin’ny fikasana hitokona nanoloana ny lapan’ny tanana izao taorian’ny fanakanan’izy ireo ny namany teny an-dalana hanao ny fitokonana.

Nanakatom-baravarana

Ankilan’izay, dia isan’ny takiana amin’izy ireo ny patanty sy hetran’ny kaominina sy ny fiantohana izay ny tompona posy ihany no tokony handoa azy ary efa misy ny fifanarahana eo amin’izy ireo sy ny kaominina. Eo ihany koa ny “capacite” izay mbola naato aloha ny fakana izany ny taona 2013 ho an’izay tsy mbola nahazo noho ny fifidianana eto amin’ny firenena.
“Leo, tena leo ny otra ataon’ireo polisy monisipaly anay izahay, aiza na misy taratasy ara-dalana ianao na tsia dia mitovy ihany, tsy maintsy manome ‘ekolazy’ 2.000 ariary na 3.000 ariary ireo polisy monisipaly vao afaka mora na manana ny taratasy rehetra aza ny tena…”, izay no nambaran’ireo mpitondra posy tafaresaka taminay izay eo am-pitaomana ny namany hitokona hanohitra izao “fanorana” tafahoatra ataon’ny polisy monisipaly ny kaominin’i Toamasina izao. Namafisin’ireto mpitondra posy ireto hatrany fa “tsy mora ny mitady ny vola alain’ny polisy monisipaly ireo aminay noho ny faharatsian’ny tsena vokatry ny tsy fisian’ny vola ho an’ny mpanjifa nateraky ny krizy; nefa dia izay no iainana isan’andro eny an-dalana tato ho ato”. Isan’ny tsy mahafaly ireto mpitondra posy koa ny sakana ataon’ny polisy nasionaly azy ireo tsy hivoaka ny tampon-tananan’i Toamasina hany fetra farany azony aleha.

Marihina fa nanakatona fivarotana avokoa ireo mpivarotra tao Bazary be sy Bazary kely noho ny tahotra ny sakoroka mety hitranga, tahaka ny zava-nisy ny taona 2010 noho ity raharaha posy ity ihany.