Roahina amin’ny toby miaramila

31/05/2013

Velon-taraina amin’izao fotoana izao ireo vady navelan’ny miaramila efa nodimandry sy ireo miaramila misotro ronono manoloana ny didim-pitsarana izay mandroaka azy ireo amin’ny faritry ny tany miaramila nisy azy ireo hatramin’izao. Ny any amin’ny toby 1/RM4 any Mahajanga no voakasik’izany olana izany mivantana amin’izao fotoana izao, saingy araka ny loharanom-baovao dia ho voakasik’izany fanampahan-kevitra izay tafiditra ao anatin’ny fanadiovana atao amin’ireo toby miaramila manerana ny Nosy izany avokoa ny any amin’ny faritra isan’isany avy.

Ho an’ireo any amin’ny Toby 1/RM4 any Mahajanga dia naneho ny halehelon’izy ireo amin’ny tsy fanajana ny zon’olombelona manoloana ny fanalana azy ireo amin’izany trano na toerana nisy azy ireo izany ireo vady miaramila na kosa miaramila misotro ronono izay mivondrona amin ‘ny fikambanana fantatra amin’ny anarana hoe SALOHY. Nambaran’ny fitarainan’izy ireo fa tamin’ny volana avrily no nanambaran’ny Chef de corps ao amin’izany toby izany ny fandroahana azy ireo hiala amin’ny trano sy ny tany efa nanorenany trano ao anatin’ny enim-bolana satria efa tsy ao anatin’ny fianankaviamben’ny miaramila intsony izy ireo. Araka ny fanazavan’izy ireo anefa dia sarotra ho azy ireo ny ahita haleha satria tsy ampy ho amin’izany ny vola fisotroan-dronono izay hany hiveloman’izy ireo amin’izao fotoana izao. Etsy an-danin’izany dia maro amin’izy ireo no efa maty vady ary efa mananotena ka tsy afa-manoatra intsony amin’ny fiainana.
Marihina fa misy tamin’ireto vady miaramila teo aloha sy miaramila misotro ronono ireto no efa nanorina trano fonenana tao anatin’ny faritry ny tany miaramila any an-toerana. Nodidiana tsy maintsy hiala amin’izany anefa izy ireo satria tsy nazoan-dàlana izany fanorenena izany tamin’ny fotoan’androny. Voararan’ny lalana rahateo ny fanorenana trano ao anaty toby miaramila.
Tsara ny manamarika fa efa nampanaovina sonia ny fanekena ny fialana amin’izany toerana izany avokoa ireo izay voakasik’izao raharaha izao.