Nankalaza ny faha 50 taonany

03/06/2013

Tao Toamasina no nisantaran’ny FIMPIMA na ny Fikambanan’ny Mpikabary Malagasy, ny fankalazany ny faha 50 taona nijoroany izay tsy hifarana raha ny ny taona 2014 amin’ny fanaovana ny zaikabe eto Antananarivo.

“Izay tia ny tenindrazany, tia ny tanindrazany”. Io no filamatry ny FIMPIMA satria amin’izy ireo dia “firenena tsy afaka handroso sy tsy ho afaka hivoatra ary firenena voazanaka, izany firenena tsy manana ny tenindrazany sy tsy manaja ny tenindrazany izany”. Koa ho an’ny FIMPIMA dia “fomba iray ampisehoan’ny Malagasy ny hambompom-pirenena ny fanomezana hasina ny teny Malagasy tenindrazany”. Efa misy ny FIMPIMA avokoa ny faritany 06 miampy an’Antsirabe sy Frantsa. Efa manodidina ny 2.000 ny mpikambana ankehitriny izay efa avo roa heny na telo henin’izany ireo efa nianatra ny kabary Malagasy ka nisafidy ny ho mpikambana tsotra.
Raha ara-tantara dia ny alahady 16 novambra 1963 tamin’ny 02ora sy sasany tao an-tranon’i Rajohnson Samuel no nananganana voalohany ny fikambanan’ny mpikambary Malagasy izay natao hoe “Firaisan’ny mpikambary” tany amboalohany; ka mpikambary fantan-daza 14 izy ireo no nanangana izany nahitana ny mpikabary isany Rajohnson, Andriamananony, Andriamorasata, Andriamalala, Rakotojaona, Andrianantenaina, Rakotojaona, Raharimanana, Ravelomanantsoa, Ratovo, Razafimahefa, Andriamanantena Georges, Ravalison, ary Rakotoson; saingy ny 04 ihany no mbola velona ankehitriny dia i Razafimahefa, Andrianantenaina, Ravalison ary Rakotoson. Tao anatin’ny 50 taona ny FIMPIMA kosa dia 08 ireo efa filoha nitarika izany ka tokana ny vehivavy dia i Randriamboavonjy Andriamalala izay filoha mitarika ny FIMPIMA ankehitriny. Raha ho an’i Toamasina nampian-trano ny fanokafana ny taon-jobily koa dia efa misy azy avokoa ny faritra 03 dia alaotra-mangoro, atsinanana ary analanjorofo, ka nahatonga ny fikambanana ho FIMPIMA AMAA Toamasina. Nandritra ity fanokafana ny taon-jobily ity ihany koa no nandrehetana ny “fanilo” ny jobily izay nampitaina tamin’ireo sampana rehetra manerana ny nosy sy ny any Frantsa; hisy koa ny fitondrana izany fanilo izany hitety ireo fari-piadidian’ny FIMPIMA, ka raha avy ao Toamasina renivohitra izany dia hiazo ny sampana ao Vavatenina, Brickaville, Vatomandry, Mahanoro, Amparafaravola, Ambatondrazana ary ho tonga eto Antananarivo ary hiazo an’i Mahajanga, Antsiranana, Antsirabe, Fianaratsoa, Toliara ary ho faranana any Frantsa. Ankoatra izay, dia nisy koa ny fizarana mari-pahaizana ho an’ireo niofana ho mpikambana teo anivon’ny FIMPIMA AMAA Toamasina niisa 134 izay ny 80% ny dia vehivavy avokoa; nahitana “tany ketsa” niisa 13 izay ny 10 mbola ankizivavy ihany koa.