Fahatsiarovana sisa tavela

04/06/2013

“Efa ho 5 taona izao no tsy nahitana fanarenana ny takelaby famatarana sy mibaiko ny fifamoivozana intsont eny amin’ny sisin-dàlana. Tsy fantatra na tafiditra na tsia ao anatin’ny laharam-pahamehan’ny tompon’andraikitry ny fanjakana izany ”, hoy Razafindrakoto Anselm, tompona sekoly fampianarana mamily iray eto an-drenivohitra.

“Sahirana mihitsy izahay mpampianatra manazava amin’ny mpianatra mamily fiara satria tsy dia ahitana takelaby loatra intsony eny amin’izay làlana aleha. Tongo-takelaka mitolefika na tapaka mihitsy, loko fotsy efa manjavozavo amin’ny arabe,… izany sisa no hany tavela amin’ireo famatarana ny fandrindrana ny fifamoivoizana eto Antananarivo. Mipetraka ho fahatsiarovana tokoa izany satria ireo tanora izay vao nahazo ny taratasy fahazon-dàlana hamily fiara dia saika mizotra an-jambany ihany , ka ny hany azo hatao dia ny mitandrina isaky ny tojo làlana mifanapaka.
Tsy olana
“Asa raha variana loatra amin’ny resaka politika ny mpitondra ka tsy maharaka intsony ny toe-draharaha misy eto amin’ny firenena. Tsy mahagaga raha mitombo isa isan’andro ny lozam-pifamoivozana misy, indrindra ny eto andrenivohitra”, hoy ny polisin’ny fifamoivoizana iray teo andoan’Analakely. “Ny tena olana ihany koa dia tsy manaja ny mpitandro ny filaminana ny maro satria efa mitsoaka kiririoka dia mbola misy ihany ny minia mandika ny torimarika omena. Ny tanàna mihitsy kosa angamba no efa baranahany”, hoy hatrany ity polisy ity. Izay aleha rehetra dia tsy ahitana takelam-pamatarana ara-dalàna eny amin’ny sisin-dàlana ohatra ny etsy Ankorahotra mihazo an’Ambanidia , Ankatso iny. Samy mizotra amin’izay tiany ny mpamily nefa dia mazava fa tsy maintsy mijanona ny avy aty Antsahabe raha hizotra ho any Akatso, na ihany koa tsy maintsy mihodidina any Antsahabe ny fiara vao afaka miampita mankany Ankatso.
Kolikoly
“Tsy ny toro-làlana amin’ny arabe ihany no tsy misy intsony fa eo koa ny tsy fahatomombanan’ny fanadinana ahazoana ireny taratasy fahazoan-dàlana mamily fiara. Mahazo vahana loatra ny kolikoly eny amin’io sehatra io raha ny loharanom-baovao azo. ”Lasa tsy mahalala ny tokony hataony akory ny mpamily fa maika ny hitondra fiara fotsiny , hany ka lasa manaonao foana, manampitrotraka ny tsy fisian’ny torolalana eny an-dàlana”, hoy hatrany Razafindrakoto Anselm. Tsy natao ahataitra moa izany raha tarafina amin’ny fiainam-pirenena ankehitriny. Raikitra sy sahirana amin’ny resaka politika avokoa ny mpitondra sy ny tompon-draharaha mahefa. Mijaly ny vahoaka lasa mandeha tsy misy lohany ny firenena. Aiza no hiafarana ?