Mitentina 20.000 tapitrisa ariary ny fahavoazana

05/06/2013

Nitrangana hay trano goavana tao Toamasina omaly. Tokony ho tamin’ny iray ora maraina no nitrangan’izany afo izany tao amin’ny trano fitahirizan’entan’ny tranombarotra iray tao Anjoma, amin’ilay faritra antsoin’ny mponina hoe “champ ville”. “Zone franche” teo aloha ity toerana ity ary lasa magazay fitehirizan’entana izy noho ny fatiantoky ny tompony teo aloha. Raha ny fanazavan’ny tompon’andraikitr’ity magazay ity dia mitentina hatrany amin’ny 20.000 tapitrisa ariary ny sandan’ny entana may sy simban’ny afo ary potiky ny rano nandritra ny famonoana ny afo. Nahitana jirofo milanja 100 taonina mahery kanefa ny 80 gony ihany no hany avotra tao amin’ity fitahirizan’entana ity. Nisylamba tonta an’arivony fonosana sy siramamy izay vao niampy 10 kaontenera ny alatsinainy ary lafarinina sy entana hafa tao anaty gony sy tao anaty “bidons” an’arivony taonina.

Ny fianakavian’ny “Trans Fy Express”, ilay antsoina hoe “SAN” no tompon’ity magazay may tao Anjoma Toamasina ity. Ny loharanom-baovao ihany no nilaza fa jiolahy saika hangalatra entana tao anaty magazay nanapaka ny “grille de protections” tamin’ny alalan’ny “chalumeau” no niteraka ny pitik’afo nahatonga ny firehetan’ny magazay. Tao amin’ny efitra nisy ireo “friperies” tany an-damosin’ny magazay no niatombohan’ny afo. Tao amin’io faritra io ihany koa no saika nidiran’ireo jiolahy izay nampiasa tohatra.

Voafehin’ny mpitandro filaminana

Nifandrimbona namono ny afo omaly tontolo ny andro ny fiara mpamonjy voina avy amin’ny kaominina sy ny avy amin’ny orinasa Ambatovy ary ireo fitaovana samy hafa an’ireo orinasa teny amin’ny manodidina. Marihina fa nisy efitra maromaro izay sarahana rindrim-bato be nifanila tamin’ilay magazay may. Mpandraharaha tera-tany karana manana zom-pirenena Malagasy sy ireo tera-tany Indiana mpanao fanondranana sy mpanafatra entana avokoa no tompon’ireo. Mbola nisy entana manodidina arivo tapitrisa ariary tao amin’izany efitra izany, toy ny jirofo, vary, siramamy, lafarinina, simenitra, ary ireo zavatra ilaina amin’ny fiainana an-davanandro isan-karazany an-hetsiny taonina. Tsy nanetsika anireo entana ireo anefa ireo tompony noho ny tahotra ny sakoroka sy ny halatra ary ny fanararaotana mety hitranga. Marihina fa maro ireo olona nitangorona teny ivelan’ny fefiben’ny magazay tamin’io fotoana io. Niaro izany hatrany izany kosa ireompitandro filaminana avy amin’ny polisim-pirenena tao anivon’ny FIP Toamasina.
Araka ny vaova azo farany dia efa mandeha ny fanadiadiana mikasika ny nahatafidiran’ireo jiolahy nitondra “chalumeau” nahatonga ny loza. Ho an’ny polisy mantsy dia tsy afa-maina fa “tena” mety ho mpiray tsikombakomba tamin’ireo jiolahy ireo mpiambina niasa rehetra ny alatsinainy nifoha talata nitrangan’ny loza.