Nilaza hitondra vahaolana ny ministera

08/11/2012

Noraisin’ny minisitry ny Fitaterana, Ramanantsoa Benjamina, nihaona taminy, omaly ireo mpitarika ny tambajotran’ny fikambanana mpiaro ny zon’ny mpanjifa na ny RNDC, notarihan’ny filohany Rakotorova Rabetsara Lita. Araka ny nambaran’ireto farany dia nampanantena azy ireo ny hitondra vahaolana tsy ho ela mikasika izao foakatry ny saram-pitaterana eto andrenivohitra izao ny minisitra.Nanaiky ny handray ireo mpitarika ny fikambanana mpiaro ny zon’ny mpanjifa

izay mivondrona ao amin’ny tambajotra RNDC, omaly ny minisitry ny Fitaterana, Ramanantsoa Benjamina izay nontronin’ny tale jeneralin’ny ministera ary ny mpiara-miasa akaiky aminy. Mazava loatra fa nohon’ny fangatahan’ireo mpitarika ity fikambanana mpiaro ny zon’ny mpanjifa ity, manoloana ny fiakatry ny saran-dalana amin’izao fotoana izao no anton’izany fihaonana izany. Nambaran’i Rakotorova Rabetsara, filohan’ny RNDC fa dinika ala-nenina ity fihaonana nataon’izy ireo tamin’ny minisitry ny Fitaterana izao, mba ialana amin’ny fifanomezan-tsiny eo anatrehan’izay mety hiseho nohon’ny tsy fisian’ny fandraisan’andraikitra manoloana ny fampakaran’ny mpitatitra ny saram-pitaterana eto an-drenivohitra.
Araka ny tatitra nataon’ireo mpikambana ao amin’ny RNDC dia nizotra tao anatin’ny firahalahiana tanteraka ny dinika teo amin’izy ireo sy ny minisitry ny Fitaterana. Soso-kevitra maro, hoy izy ireo, no natolotra ny minisitra mba hialana amin’ity fampakaran’ny mpitatitra ny saran-dàlana ity. Isan’izany ny amin’ny tokony hametrahana zotra vaovao hifaninana amin’ireo zotra efa misy amin’izao fotoana izao satria iray amin’ireo zo fototra ananan’ny mpanjifa ny fahafahana misafidy ny vokatra ho jifainy. Marihana anefa fa tokony ho 300 ariary ny saram-pitaterana amin’ireo zotra vaovao ireo. Ankoatr’izay dia isan’ny soso-kevitra naroson’ireo mpitarika ny fikambanana mpiaro ny zon’ny mpanjifa ihany koa ny hamoahan’ny ministera fiantsoana ireo izay manana fiarakodia ka hanomezana alalana azy ireo hanao ny asa fitaterana an-drenivohitra, raha liana amin’izany izy ireo. Ny tanjona dia ny mba hisian’ny mpifaninana maro amin’ireo mpitatitra efa manao izany asa izany amin’izao fotoana izao.
Marihana far aha araka ny nambaran’i Rakotorova Rabetsara dia nankatoavin’ny minisitra ireo soso-kevitra naroson’ny RNDC ireo. Nanambara, hoy izy, ny minisitra fa handray fanampahan-kevitra haingana dia haingana mba hitondrana vaha-olana amin’ity raharaha fiakaran’ny saram-pitaterana ity.
Nanamarika ihany koa, tetsy an-danin’izany, ireo mpitarika ny RNDC fa tsy hijanona amin’ny fitakiana manandrify ny saran-dalana fotsiny ihany izao hetsika ataon’izy ireo izao. Mbola isan’ny tsy maintsy himasoana ihany koa, hoy izy ireo lafin-javatra hafa izay mampijaly ny vahoaka amin’izao fotoana izao.